الماتىدا بەلگىسىز ەر ادامنىڭ بالاعا شابۋىل جاساعانى تۋرالى حابارلامادان كەيىن پوليسيا تەرگەۋ باستادى. وقيعا «اتاكەنت» ساياباعىنىڭ ماڭىندا بولعان. قورعانىس مينيسترلىگىنىڭ مالىمەتىنشە، ءقاۋىپتى سالداردىڭ الدىن الۋعا جاقىن جەردە بولعان اسكەري قىزمەتشىلەر كومەكتەسكەن، دەپ حابارلايدى infohub.kz سايتى.
كەيىن Threads الەۋمەتتىك جەلىسىندە زارداپ شەككەن بالانىڭ اناسى ەكەنىن ايتقان ايەل وقيعانىڭ ءمان-جايىن اشىپ ايتتى. ونىڭ ايتۋىنشا، بەلگىسىز ادام جاتتىعۋدا بولعان بالالارعا شابۋىل جاساعان. «ول قازاقتاردى جەك كورەتىنىن ايعايلاپ، بالالاردى پىشاقتاپ تاستايمىن دەپ قورقىتقان. الدىمەن ءبىر قىزدى ۇرۋعا تىرىسقان، ءبىراق ول ۇلگەرىپ قاشىپ كەتكەن. سوسىن مەنىڭ 10 جاسار ۇلىمنىڭ كوزىنە جۇدىرىقپەن ۇرعان. بالانىڭ كوزىنىڭ استى كوگەرىپ قالدى. بالالار قورقىپ، قاشىپ ۇلگەردى»، — دەپ جازدى ول.
ايەل سول ساتتە جاقىن جەردە اسكەري قىزمەتشىلەر بولعانىن راستادى. ولار كۇدىكتىنى قۋىپ جەتىپ، ۇستاپ، 102-گە حابارلاسىپ، پوليسيا قىزمەتكەرلەرىنە تاپسىرعان. «بۇگىن مەنىڭ بالام زارداپ شەكتى. ەرتەڭ ونىڭ ورنىندا كەز كەلگەن باسقا بالا بولۋى مۇمكىن. باقىتىمىزعا وراي، بالالار قاشىپ ۇلگەردى. مۇنىڭ قالاي اياقتالۋى مۇمكىن ەدى دەپ ويلاۋ دا قورقىنىشتى»، — دەپ قوستى ول.
NUR.KZ تىلشىسىنە الماتى پوليسيا دەپارتامەنتىنىڭ ءباسپاسوز قىزمەتى كۇدىكتىنىڭ ۇستالىپ، پوليسياعا جەتكىزىلگەنىن راستادى. «ساياباق اۋماعىندا كامەلەتكە تولماعانعا قاتىستى كۇش قولدانۋ فاكتىسى بويىنشا بوستاندىق اۋداندىق پوليسيا باسقارماسى تەرگەۋ جۇرگىزىپ جاتىر. قازاقستان رەسپۋبليكاسىنىڭ زاڭناماسىنا سايكەس مىندەتتى تۇردە قۇقىقتىق باعا بەرىلىپ، پروسەسسۋالدىق شەشىم قابىلدانادى»، — دەپ حابارلادى پوليسيادا.
قازىرگى ۋاقىتتا پوليسيا وقيعانىڭ ءمان-جايىن انىقتاپ جاتىر.