ەندى الماتىلىقتار قالالىق كىتاپحانالاردىڭ كىتاپتارىن ايگىلى «باراحولكانىڭ» باسىندا ورنالاسقان Adem ساۋدا ورتالىعىنان تىكەلەي الا الادى، دەپ حابارلايدى infohub.kz سايتى.
اكىمدىك ءباسپاسوز قىزمەتىنىڭ مالىمەتىنشە، جاڭا كىتاپ بەرۋ پۋنكتىندە 2 مىڭنان استام كىتاپ بار. بولاشاقتا قالانىڭ باسقا اۋداندارىنداعى ساۋدا ورتالىقتارىندا دا وسىنداي سورەلەر پايدا بولادى. بۇل قاعاز كىتاپ وقۋعا ورالعىسى كەلەتىندەردىڭ بارىنشا كوبىن قامتۋعا كومەكتەسەدى.
«كۇندەلىكتى ومىردە كىتاپحاناعا ارنايى بارىپ، كىتاپ الۋعا ءاردايىم مۇمكىندىك بولا بەرمەيدى. ەندى جۇمىس ورنىنان الىستاماي-اق، بوس ۋاقىتتا وسىندا كەلۋگە بولادى. بۇل — وسىندا جۇمىس ىستەيتىن كاسىپكەرلەر مەن قىزمەتكەرلەرگە عانا ەمەس، ساۋدا ورتالىعىنا كەلۋشىلەرگە دە جاقسى مۇمكىندىك دەپ ويلايمىن»، — دەدى كاسىپكەر زالينا.
جاڭا كىتاپ بەرۋ پۋنكتى سەيسەنبىدەن جەكسەنبىگە دەيىن ساعات 09:00-دەن 18:00-گە دەيىن جۇمىس ىستەيدى. وندا قازاق جانە ورىس تىلدەرىندەگى باسىلىمدار ۇسىنىلعان.
ەسكە سالايىق، كىتاپحانالاردان تىس جەرلەردە كىتاپتاردى تەگىن الۋعا الماتى مەتروسىنىڭ ستانسيالارىندا جانە كەيبىر ساۋدا ورتالىقتارىندا دا بولادى، ونداعى سورەلەر اۆتونومدى. ال «باراحولكادا» كىتاپتاردى ادام بەرەدى.
بۇعان دەيىن الەۋمەتتىك جەلى قولدانۋشىلارى قازاقستانداعى ەڭ ادەمى كىتاپحانالاردىڭ ءبىرى دەپ اتالعان قوسشى قالاسىنداعى كىتاپحاناعا ءتانتى بولعانى حابارلانعان ەدى.