ۇكىمەت وتىرىسىندا پرەمەر-مينيستر ولجاس بەكتەنوۆ ەنەرگەتيكا مينيسترىنە 14 تامىزدا الماتىدا بولعان جاپپاي ەلەكتر قۋاتىنىڭ وشىرىلۋىنە قاتىستى تەكسەرۋ ناتيجەلەرى تۋرالى سۇراق قويدى، دەپ حابارلايدى infohub.kz.
ەنەرگەتيكا ءمينيسترى ەرلان اقكەنجەنوۆتىڭ مالىمدەۋىنشە، ەلىمىزدىڭ وڭتۇستىك وڭىرلەرىندەگى ەلەكتر ەنەرگياسى تاپشىلىعىن ەسكەرە وتىرىپ، مينيسترلىك الماتىداعى جەو-2 جانە جەو-3، سونداي-اق تۇركىستان وبلىسىنداعى قۋاتى 1000 مەگاۆاتت جاڭا بۋ-گاز قوندىرعىسىن قوسا العاندا، جاڭا گەنەراسيا وبەكتىلەرىن ىسكە قوسۋدى اياقتاپ جاتىر. سونىمەن قاتار، ەلەكتر جەلىلەرى نىعايتىلۋدا: وڭتۇستىك ەنەرگيا جۇيەسىنىڭ سەنىمدىلىگىن ارتتىرۋ ءۇشىن شۋ-جامبىل-شىمكەنت 500 كيلوۆولتتىك جەلىسى سالىنۋدا.
بەكتەنوۆ بۇل ستراتەگيالىق ماڭىزدى باعىت ەكەنىن اتاپ ءوتىپ، وسى جۇمىستى جانداندىرۋ قاجەتتىگىن ايتتى.
ەسكە سالايىق، 14 تامىزدا الماتى مەن الماتى وبلىسىندا اۋقىمدى بلەكاۋت بولدى. ەنەرگەتيكا مينيسترلىگى ءباسپاسوز قىزمەتىنىڭ مالىمەتىنشە، ونىڭ سەبەبى — ورتالىق ازيا ەنەرگيا جۇيەسى تاراپىنان ەلەكتر ەنەرگياسى اعىنىنىڭ كۇرت وزگەرۋىنەن تۋىنداعان قۋاتتىڭ ارتۋى. سونىڭ سالدارىنان اۆارياعا قارسى اۆتوماتتى جۇيە ىسكە قوسىلىپ، قازاقستاننىڭ كەيبىر وڭىرلەرىندە ءبىرقاتار تۇتىنۋشىلار ەلەكتر قۋاتىنان اجىراتىلدى.
الماتىدا باعدارشامدار ءوشىپ، جولداردا كەپتەلىس پايدا بولىپ، قالا تۇرعىندارى وزدەرى قوزعالىستى رەتتەۋگە شىقتى. سونداي-اق، سىرتقى ەلەكترمەن جابدىقتاۋ تولىق توقتاعاندىقتان، مەترو ۋاقىتشا جۇمىسىن توقتاتتى، ال «شىمبۇلاق» كۋرورتىنىڭ كەلۋشىلەرى كانات جولىنىڭ كابينالارىندا قالىپ قويدى.
كەيىنىرەك KEGOC كومپانياسى ەلەكتر قۋاتىنىڭ ءوشىرىلۋى قازاقستاننىڭ سەگىز وڭىرىندە بايقالعانىن حابارلادى.