2026 جىلدىڭ 1 قىركۇيەگىنەن باستاپ الماتىدا اۆتوموبيلدەردىڭ ەكولوگيالىق نورماتيۆتەرگە سايكەستىگىنە ارنالعان جەكە تەحنيكالىق تەكسەرۋ ەنگىزىلەدى. بەنزين، گاز جانە ديزەل وتىنىمەن جۇرەتىن كولىكتەر ءۇشىن كەزەكتى تەحنيكالىق بايقاۋ مەرزىمى كەلگەندە بۇل تەكسەرۋ مىندەتتى بولادى، دەپ حابارلايدى infohub.kz سايتى.
LEZ جوباسىنىڭ ۇيلەستىرۋشىسى دۋلات ماراتوۆ اتاپ وتكەندەي، ادەتتەگى تەحنيكالىق بايقاۋ مەن جاڭا ەكولوگيالىق تەكسەرۋ – مۇلدەم باسقا پروسەدۋرالار. ءبىرىنشىسى كولىكتىڭ جالپى تەحنيكالىق جاعدايىن باعالاسا، ەكىنشىسى تەك ست رك 1433-2023 ستاندارتى بويىنشا شىعارىندىلاردى ولشەۋگە باعىتتالعان.
بەنزين جانە گاز كولىكتەرىندە پايدالانىلعان گازداردىڭ ۋىتتىلىعى، ال ديزەلدى كولىكتەردە ءتۇتىننىڭ مولشەرى تەكسەرىلەدى. ەكوتەستەن وتپەيىنشە، دياگنوستيكالىق كارتا الۋ مۇمكىن بولمايدى.
اۆتوكولىك يەلەرىنە تەكسەرۋدەن الدىن الا ءوتۋدىڭ قاجەتى جوق. ەگەر كولىك 1 قىركۇيەككە دەيىن تەحنيكالىق بايقاۋدان وتكەن بولسا، بەرىلگەن قۇجات مەرزىمى اياقتالعانعا دەيىن جارامدى بولادى. الايدا كەلەسى تەكسەرۋ مەرزىمى كەلگەندە، قاجەتتى جابدىقتارى بار اككرەديتتەلگەن ستانسيالارعا بارۋعا تۋرا كەلەدى. كادىمگى تەحنيكالىق بايقاۋدى كەز كەلگەن جۇمىس ىستەپ تۇرعان پۋنكتتەن وتۋگە بولادى.
سونىمەن قاتار، اككرەديتتەلگەن ستانسيادا جۇرگىزۋشى ەكى پروسەدۋرانى دا ءبىر ۋاقىتتا وتە الادى. مۇنداي پۋنكتتەردىڭ ءتىزىمى almaty-parking.kz سايتىندا جاريالانادى.
سونىمەن قاتار، جينالعان دەرەكتەر LEZ تومەن شىعارىندىلار ايماعى ءۇشىن اۆتوپاركتىڭ ەكولوگيالىق جاعدايىنىڭ وبەكتيۆتى بازاسىن قالىپتاستىرۋعا مۇمكىندىك بەرەدى.