الماتىدا ايىپپۇل تۇراعىندا كيكشەرينگ كومپانيالارىنىڭ 9 مىڭنان استام جالدامالى ەلەكتروساموكاتى جينالىپ قالدى — تەحنيكا سوندا ايلاپ تۇر. بۇل تۋرالى قالالىق پوليسيا دەپارتامەنتى حابارلادى، دەپ جازادى infohub.kz سايتى.
جالدامالى ەلەكتروساموكاتتارعا جىلدامدىق شەكتەۋى شىلدەنىڭ باسىنان كۇشىنە ەندى. 25 تامىزدان باستاپ وسى كولىكپەن تروتۋارمەن جۇرۋگە، سونداي-اق جۇرگىزۋشى كۋالىگىنسىز پايدالانۋعا تىيىم سالىندى؛ سونىمەن قاتار جۇرگىزۋشى دۋلىعا كيۋگە مىندەتتى. پوليسيا كوشەلەردى بەلسەندى تۇردە پاترۋلدەپ، ەرەجە بۇزىلعان جاعدايدا كولىكتى ايىپپۇل تۇراعىنا قويادى.
ءبىر ايعا جەتەر-جەتپەس ۋاقىتتا — 25 تامىزدان بەرى — «ساموكاتشىلارعا» قاتىستى 6 مىڭنان استام اكىمشىلىك حاتتاما تولتىرىلدى. ناتيجەسىندە، پوليسيا دەپارتامەنتىنىڭ دەرەگىنشە، ءقازىر ايىپپۇل تۇراعىندا 9 مىڭنان استام ەلەكتروساموكات تۇر.
«كولىك قۇرالى تەحنيكالىق جاعىنان جارامدى، تىركەۋ نومىرلەرى بار بولۋى كەرەك. وعان تەك كامەلەتكە تولعان، كولىك جۇرگىزۋ قۇقىعى بار ادامدار عانا قول جەتكىزە الادى»، — دەپ اتاپ ءوتتى الماتى پوليسيا دەپارتامەنتىنىڭ ءباسپاسوز حاتشىسى سالتانات ازىربەك. ايتپەسە ساموكاتتار ايىپپۇل تۇراعىنا تۇسەدى.
پايدالانۋشى ءۇشىن تروتۋارمەن ءجۇرۋ، جولاۋشى مەن جۇك تاسۋ، سونداي-اق ساموكاتتى قاسىندا دومالاتىپ اپارماي، جاياۋ جۇرگىنشىلەر وتكەلىمەن ءوتۋ 21 625 تەڭگە ايىپپۇل سالۋعا اكەپ سوعادى. توتەنشە جاعداي تۋىنداسا، ايىپپۇل مولشەرى ارتادى.
ەسكە سالايىق، جىلدار بويى كيكشەرينگ ساموكاتتارى «سوڭعى شاقىرىم» كولىگىنە اينالعان ەدى — مىسالى، مەترو ستانسياسىنا جەتۋ ءۇشىن. كوپتەگەن شەكتەۋمەن بۇل قىزمەت ماعىناسىز بولىپ قالدى. ال بيىلعى جازدا جول جوندەۋ جۇمىستارىنىڭ كوپتىگىنەن ولارعا دەگەن سۇرانىس، كەرىسىنشە، ارتتى.
بۇعان دەيىن Kursiv LifeStyle ساموكاتتارداعى جىلدامدىقتى شەكتەۋگە قارسى الماتىلىقتار بىرنەشە پەتيسيا جاريالاعانىن جازعان. سولاردىڭ بىرىندە بۇل شارا ابسۋرد دەپ اتالعان.