الماتى قالاسىنىڭ ەكولوگيا جانە قورشاعان ورتا باسقارماسى حالىقتان ەسكى اۆتوكولىكتەردى ساتىپ الۋ مەحانيزمىنىڭ مالىمەتتەرىن اشتى، دەپ حابارلايدى infohub.kz سايتى.
بۇعان دەيىن الماتىدا اۆتوپاركتى جاڭارتۋ ءۇشىن مامانداندىرىلعان كومپانيا قۇرۋ جوسپارلانعانى بەلگىلى بولعان ەدى. اكىمدىكتە: "جوبا اياسىندا ەكولوگيالىق تازا اۆتوكولىكتەردى ساتىپ الۋ ءۇشىن جەڭىلدىكتى نەسيەلەۋ، ليزينگتىك باعدارلامالار مەن Trade-In ەنگىزۋ مۇمكىندىگى قاراستىرىلۋدا. وعان Astana Motors، Orbis جانە باسقا دا كومپانيالاردى قوسا العاندا، جەرگىلىكتى اۆتوكولىك وندىرۋشىلەردى تارتۋ جوسپارلانۋدا"، - دەپ حابارلاعان.
ەكولوگيا باسقارماسىندا ساتىپ الۋ مەحانيزمى 2026-2027 جىلدارعا ارنالعان اتموسفەرالىق اۋا ساپاسىن جاقسارتۋ جونىندەگى ءىس-شارالار جوسپارىنا ەنگىزىلگەنىن اتاپ ءوتتى. "الماتى قالاسىنىڭ اتموسفەرالىق اۋانى قورعاۋ قاعيدالارىن ىسكە اسىرۋ اياسىندا "الماتى" الەۋمەتتىك-كاسىپكەرلىك كورپوراسياسى" اق 2026-2028 جىلدارعا ارنالعان اۆتوكولىك قۇرالدارىن قايتا وڭدەۋ بويىنشا وڭىرلىك باعدارلامانىڭ جوباسىن ازىرلەدى. قازىرگى ۋاقىتتا باعدارلاما پىسىقتالۋ ساتىسىندا"، - دەپ ءتۇسىندىردى ۆەدومستۆودا.
سپك "الماتى" جاڭا مەحانيزمدى ەنگىزۋ اۆتوكولىكتەردىڭ اۋانىڭ لاستانۋىنا ايتارلىقتاي اسەر ەتۋىنە بايلانىستى ەكەنىن قوستى. "ەكولوگيالىق تالاپتارعا سايكەس كەلمەيتىن ەسكى اۆتوكولىكتەردى كەيىننەن قايتا وڭدەۋمەن ساتىپ الۋ مەحانيزمىن ەنگىزۋ جوسپارلانۋدا. مۇنداي شارالار اۆتوپاركتى جاڭارتۋدى ىنتالاندىرۋعا جانە ەسكى اۆتوكولىكتەر سانىن ازايتۋعا مۇمكىندىك بەرەدى. بۇل ءوز كەزەگىندە اتموسفەراعا شىعارىلاتىن زياندى زاتتار كولەمىنىڭ ازايۋىنا ىقپال ەتەدى"، - دەپ مالىمدەدى سپك-دا.
باعدارلاما ازىرلەۋ ساتىسىندا تۇر، قاتىسۋ شارتتارى مەن ىسكە اسىرۋ ءتارتىبى ازىرگە جاريالانبايدى. دەگەنمەن، حالىقتان اۆتوكولىكتەردى تىكەلەي ساتىپ الۋ قاراستىرىلماعانى اتاپ وتىلەدى. ونىڭ ورنىنا ىسكە اسىرۋعا اۆتوديلەرلەر مەن وتاندىق وندىرۋشىلەر تارتىلادى. "قازىرگى ۋاقىتتا اۆتوديلەرلەر مەن اۆتوكولىك وندىرۋشىلەردى جەڭىلدىكتى قارجىلاندىرۋ مەحانيزمى قاراستىرىلۋدا. وعان سايكەس ەكولوگيالىق كلاسى تومەن اۆتوكولىك يەلەرىنە جاڭا اۆتوكولىك ساتىپ الۋ كەزىندە جەڭىلدىك سەرتيفيكاتتارىن بەرۋ جوسپارلانۋدا"، - دەلىنگەن جاۋاپتا.