الماتىدا قازاقستان-قىتاي بىرلەسكەن جەر سىلكىنىسىن زەرتتەۋ ورتالىعى جۇمىسىن باستادى، دەپ حابارلايدى infohub.kz.
سالتاناتتى اشىلۋ راسىمىنە توتەنشە جاعدايلار ءمينيسترى شىڭعىس ارينوۆ، الماتى اكىمى دارحان ساتىبالدى جانە قىتايدىڭ الماتىداعى باس كونسۋلى سۋ فانسيۋ قاتىستى.
قالا اكىمدىگىنىڭ مالىمەتىنشە، جاڭا الاڭ قازاقستاندىق جانە قىتايلىق عالىمداردىڭ سەيسمولوگيا سالاسىنداعى كۇش-جىگەرىن بىرىكتىرەدى. مۇندا جەر سىلكىنىسىن باقىلاۋ، بولجاۋ جانە ەرتە ەسكەرتۋ تەحنولوگيالارىن دامىتۋ جوسپارلانۋدا. بىرلەسكەن زەرتتەۋلەر زاماناۋي عىلىمي ازىرلەمەلەردى ەنگىزۋگە، تاجىريبە الماسۋعا جانە قالا مەن ايماقتىڭ سەيسميكالىق قاۋىپسىزدىك دەڭگەيىن ارتتىرۋعا مۇمكىندىك بەرەدى، دەپ اتاپ ءوتتى اكىمدىكتە.
تجم اقپاراتىنا سايكەس، قازاقستاندىق تاراپ ورتالىق جۇمىسى ءۇشىن قاجەتتى ينفراقۇرىلىمدى ءقازىردىڭ وزىندە جاساقتاعان. ۇلتتىق سەيسمولوگيا عىلىمي ورتالىعىنىڭ قۇرىلىمىندا ءۇش مامانداندىرىلعان زەرتحاناسى بار جەر سىلكىنىسىن زەرتتەۋ ورتالىعى جۇمىس ىستەيدى. ولاردىڭ بەيىنى بولاشاق بىرلەسكەن ورتالىقتىڭ ۇلگىسىنە سايكەس كەلەدى، بۇل بىرلەسكەن زەرتتەۋلەردى ءدال ءقازىر باستاۋعا مۇمكىندىك بەرەدى.
ىنتىماقتاستىق اياسىندا ق ر تجم سەيسمولوگيالىق باقىلاۋ جانە زەرتتەۋ ۇلتتىق عىلىمي ورتالىعى مەن قحر جەر سىلكىنىسى باسقارماسىنىڭ گەوفيزيكا ينستيتۋتى گەوفيزيكا جانە سەيسمولوگيا سالاسىنداعى ءوزارا تۇسىنىستىك تۋرالى مەموراندۋمعا قول قويدى.
ەسكە سالا كەتەيىك، قازاقستان پرەزيدەنتى قاسىم-جومارت توقايەۆ پەن قحر ءتوراعاسى سي ءسزينپيننىڭ استاناداعى جاقىندا وتكەن كەلىسسوزدەرىنىڭ قورىتىندىسى بويىنشا 24 ۇكىمەتارالىق جانە ۆەدومستۆوارالىق قۇجاتقا، ونىڭ ىشىندە ورتالىق قۇرۋ تۋرالى كەلىسىمگە قول قويىلعان بولاتىن.
بۇعان دەيىن شىلدە ايىنىڭ سوڭىندا الماتى تۇرعىندارى جەر استى دۇمپۋلەرىن سەزىنگەنى، ال تجم دابىل چەمودانىن دايىنداۋ قاجەتتىگىن ەسكەرتكەنى حابارلانعان.