الماتىدا قۇلجا تراكتىسىنىڭ ءبىر بولىگىندە جول قوزعالىسى ۋاقىتشا شەكتەلەدى، دەپ حابارلايدى infohub.kz سايتى.
24 شىلدە ساعات 20:00-دەن 27 شىلدە ساعات 08:00-گە دەيىن بۇقتىرما كوشەسىنەن الماتى قالاسىنىڭ شەكاراسىنا دەيىنگى ارالىقتا رەۆەرسيۆتى قوزعالىس ۇيىمداستىرىلادى.
شەكتەۋلەر جول جابىنىن ورتاشا جوندەۋ اياسىندا اسفالتبەتوننىڭ جوعارعى قاباتىن توسەۋگە بايلانىستى ەنگىزىلۋدە.
«جول قوزعالىسىنا قاتىسۋشىلاردى ۋاقىتشا قولايسىزدىقتاردى تۇسىنىستىكپەن قابىلداپ، ۋاقىتشا جول بەلگىلەرىنىڭ تالاپتارىن جانە جىلدامدىق رەجيمىن ساقتاۋعا شاقىرامىز»، – دەلىنگەن الماتى اكىمدىگىنىڭ حابارلاماسىندا.
جوندەلىپ جاتقان ۋچاسكەدە ەسكەرتۋ بەلگىلەرى، سونداي-اق مەردىگەر ۇيىم باسشىسىنىڭ بايلانىس اقپاراتى كورسەتىلگەن ستەندتەر ورناتىلادى.
جۇرگىزۋشىلەرگە ۋاقىتشا شەكتەۋلەردى ەسكەرە وتىرىپ، باعىتتى الدىن الا جوسپارلاۋ ۇسىنىلدى.
اكىمدىك جول قوزعالىسىن شەكتەۋ تۋرالى اقپاراتتىڭ @AlmatyJoly Telegram-ارناسىندا، قالالىق بيلىكتىڭ الەۋمەتتىك جەلىلەرىندە، سونداي-اق 2GIS جانە «ياندەكس كارتى» سەرۆيستەرىندە جاريالاناتىنىن ەسكە سالدى.