الماتى ماڭىندا «ازاماتتارعا ارنالعان ۇكىمەت» فيليالىنىڭ قىزمەتكەرى قىزمەتتىك كولىكپەن 77 جاستاعى ايەلدى قاعىپ، وقيعا ورنىنان قاشىپ كەتتى. قايعىلى وقيعا 11 تامىزدا الماتى – شەلەك – قورعاس – بايسەيىت تاس جولىندا بولعان، دەپ حابارلايدى infohub.kz.
بۇل وقيعا الەۋمەتتىك جەلىلەردە جاريالانعاننان كەيىن كەڭىنەن تارادى. جازبا اۆتورى جازىلۋشىعا سىلتەمە جاساپ، اپات جۇمىس ۋاقىتىنان تىس بولعانىن، ال قىزمەتتىك كولىكتى بىرنەشە كۇن بويى جاسىرعانىن ايتقان. سونىمەن قاتار، جاريالانىمدا فيليال باسشىلىعى ورتالىق اپپاراتقا ۋاقتىلى حابارلاماعانى ايتىلعان.
«ازاماتتارعا ارنالعان ۇكىمەت» ۇلتتىق كومپانياسىندا الماتى وبلىسى فيليالىنىڭ قىزمەتكەرى قىزمەتتىك كولىكپەن جۇرگىزگەن جكو بولعانىن راستادى. اقپارات العاننان كەيىن ولار قىزمەتتىك تەرگەۋ جۇرگىزدى.
«وقيعا تۋرالى اقپارات العاننان كەيىن مەملەكەتتىك كورپوراسيا ءوز قۇزىرەتى شەگىندە قىزمەتتىك تەرگەۋ جۇرگىزدى، ونىڭ بارىسىندا لاۋازىمدى تۇلعالاردىڭ ارەكەتتەرىنە، ىشكى باقىلاۋ دەڭگەيىنە جانە قىزمەتتىك كولىكتى پايدالانۋدى ۇيىمداستىرۋعا باعا بەرىلدى»، — دەپ ءتۇسىندىردى «ازاماتتارعا ارنالعان ۇكىمەتتە».
تەكسەرۋ قورىتىندىسى بويىنشا فيليال ديرەكتورىنىڭ جالپى ماسەلەلەر جونىندەگى ورىنباسارى تارتىپتىك جازاعا تارتىلدى. سەبەپ رەتىندە قىزمەتتىك كولىكتى پايدالانۋدى ءتيىستى باقىلاماۋ، سونداي-اق قىزمەتتىك اقپاراتتىڭ تولىقتىعى مەن وبەكتيۆتىلىگىن قامتاماسىز ەتپەۋ اتالدى. فيليال ديرەكتورى دا تارتىپتىك جاۋاپكەرشىلىككە تارتىلدى — جالپى باسشىلىق پەن باقىلاۋ، ىشكى باقىلاۋ جۇيەسىن ۇيىمداستىرۋ، سونداي-اق م ۇلىكتىڭ ساقتالۋى مەن ماقساتتى پايدالانىلۋىن قامتاماسىز ەتۋ بولىگىندەگى مىندەتتەردى ءتيىستى ورىنداماعانى ءۇشىن.
الايدا الەۋمەتتىك جەلىلەردەگى كولىكتى ءۇش كۇن بويى ادەيى جاسىردى دەگەن مالىمدەمە رەسمي جاۋاپتا تىكەلەي راستالماعان.
الماتى وبلىسى پوليسياسى اپاتتىڭ ءمان-جايىن حابارلادى.
«الدىن الا دەرەكتەر بويىنشا، 11 تامىزدا ساعات 20:00 شاماسىندا الماتى – شەلەك – قورعاس – بايسەيىت تاس جولىندا Kia Sorento 77 جاستاعى ايەلدى قاعىپ كەتكەن. ايەل جولدى بەلگىلەنبەگەن جەردەن كەسىپ وتكەن. العان جاراقاتتارىنان ول قايتىس بولدى»، — دەپ حابارلادى پوليسيادا.
سونداي-اق، اپاتتان كەيىن جۇرگىزۋشى وقيعا ورنىنان كەتكەنى انىقتالدى. كەيىن پوليسەيلەر ونىڭ جەكە باسىن انىقتاپ، ۇستاپ، قاماۋعا الدى. وعان 26 جاس.
قازىرگى ۋاقىتتا ولىممەن اياقتالعان جكو فاكتىسى بويىنشا تەرگەۋ ارەكەتتەرى جالعاسۋدا. پوليسيا وقيعانىڭ ءمان-جايى مەن سەبەپتەرىن انىقتاۋدا.
«ازاماتتارعا ارنالعان ۇكىمەت» جۇرگىزۋشىنىڭ زاڭدى جاۋاپكەرشىلىگى ماسەلەسى قۇقىق قورعاۋ جانە سوت ورگاندارىنىڭ قۇزىرەتىندە ەكەنىن اتاپ ءوتتى. مەملەكەتتىك كورپوراسيا قايتىس بولعان ايەلدىڭ تۋىستارى مەن جاقىندارىنا كوڭىل ايتتى.