الماتى ءماسليحاتىنىڭ دەپۋتاتتارى «مەدەۋ» ەرەكشە قورعالاتىن تابيعي اۋماعى مەن «شىمبۇلاق» شاتقالىنا كولىك كىرۋىن شەكتەۋ تۋرالى شەشىمدى قولدادى، دەپ حابارلايدى infohub.kz سايتى.
اعىمداعى جىلدىڭ ساۋىرىندە الماتىدا مەدەۋگە كولىكپەن كىرۋ شەكتەلۋى مۇمكىن ەكەنى، سونداي-اق تومەنگى بولىكتە تۇراقتاردى كوبەيتۋ ماسەلەسى قارالىپ جاتقانى حابارلانعان بولاتىن. ونى سول كەزدە مەدەۋ اۋدانىنىڭ اكىمى ەركەبۇلان ورازالين ايتقان ەدى.
جوبانى سەسسيادا الماتى ەكولوگيا جانە قورشاعان ورتانى قورعاۋ باسقارماسى باسشىسىنىڭ ورىنباسارى ارشات باقتىگەرەيەۆ تانىستىردى. ونىڭ ايتۋىنشا، شەكتەۋلەر ەرەكشە قورعالاتىن تابيعي اۋماققا كولىك جانە انتروپوگەندىك جۇكتەمەنى ازايتۋ ءۇشىن ەنگىزىلىپ وتىر.
جاڭا ءتارتىپتىڭ قاجەتتىلىگى كونستيتۋسيالىق سوتتىڭ 2026 جىلعى 12 ماۋسىمداعى قاۋلىسىنان كەيىن تۋىنداعانى حابارلانادى. سوت 2016 جىلى اكىمدىك قاۋلىسىمەن بەلگىلەنگەن بۇرىنعى شەكتەۋدى كونستيتۋسياعا سايكەس ەمەس دەپ تانىپ، مۇنداي شەشىمدەر ءماسليحاتتىڭ قۇزىرەتىنە جاتاتىنىن جانە تۇرعىنداردىڭ قۇقىقتارىن ەسكەرۋى ءتيىس ەكەنىن كورسەتتى.
«ءبىز بۇرىنعى ءتارتىپتى جاي ساقتاپ قانا قويماي، ەكولوگيالىق جاعدايدى، زاڭناما تالاپتارىن جانە تۇرعىنداردىڭ قۇقىقتارىن ەسكەرە وتىرىپ، كولىك جۇكتەمەسىن رەتتەۋدىڭ زاڭدى تەتىگىن بەلگىلەۋدى ۇسىنىپ وتىرمىز»، — دەدى ارشات باقتىگەرەيەۆ.
باسقارما دەرەگىنشە، باقىلاۋ-وتكىزۋ پۋنكتىسىنەن كۇن سايىن شامامەن 700 كولىك وتەدى. 2026 جىلدىڭ سەگىز ايىندا 179 024 ءوتۋ تىركەلسە، 2022 جىلى بۇكىل جىل بويى 76 606 ءوتۋ بولعان.
«قابىلدانعان شەشىم ىشكى جانۋ قوزعالتقىشى بار كولىكتەردىڭ كىرۋىن شەكتەۋدى كوزدەيدى. ەلەكتروموبيلدەر ءۇشىن جەكە رەجيم بەلگىلەندى: جۇمىس كۇندەرى كىرۋگە رۇقسات بەرىلەدى، ال دەمالىس جانە مەرەكە كۇندەرى شەكتەۋ بارلىق كولىك قۇرالدارىنا قولدانىلادى»، — دەلىنگەن حابارلامادا.
سونىمەن قاتار جاڭا ءتارتىپ تۇرعىنداردىڭ مۇددەسىن، سونداي-اق جەدەل، كوممۋنالدىق جانە ارنايى قىزمەتتەردىڭ جۇمىسىن ەسكەرەتىنى ايتىلادى. مۇندا 48 جەكە ءۇي، «قازگيدرومەت» پەن «قازسەلقورعانىستىڭ» قىزمەتتىك-تۇرعىن عيماراتتارى، سونداي-اق تۇيىقسۋ شاتقالىنىڭ نىساندارى ورنالاسقانى ەرەكشە اتاپ وتىلەدى.