الماتىدا كامەلەتكە تولماعان جۇرگىزۋشى كولىكپەن جەكە ءۇيدىڭ قورشاۋىنا سوعىلدى. وقيعا 1 قىركۇيەكتە تاڭەرتەڭ بولعان، دەپ حابارلايدى infohub.kz سايتى.
جول اپاتىنىڭ سالدارى تۇسىرىلگەن ۆيدەو Instagram-داعى sergek.kaz پاراقشاسىندا جاريالاندى. كادرلاردا Nissan Patrol جىلدامدىقپەن تاس قورشاۋ مەن قاقپاعا سوعىلىپ، ولاردىڭ ءبىر بولىگىن تولىعىمەن قيراتقانى كورىنەدى.
الماتى پوليسيا دەپارتامەنتىنىڭ مالىمەتىنشە، اپات ساعات 10:00-دە تۇركسىب اۋدانىندا بولعان. كامەلەتكە تولماعان جۇرگىزۋشى ءتوقتوعۇل كوشەسىمەن وڭتۇستىك باعىتتا كەلە جاتىپ، ارتيللەريسكايا كوشەسىنىڭ قيىلىسىندا رۋلگە يە بولا الماي، جەكە ءۇيدىڭ مەتالل قورشاۋىنا سوعىلعان. جول اپاتىنان ەشكىم زارداپ شەككەن جوق.
تۇركسىب اۋدانى پوليسيا باسقارماسىنىڭ قىزمەتكەرلەرى وقيعانىڭ ءمان-جايىن انىقتاپ جاتىر. بالانى تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن كامەلەتكە تولماعان جۇرگىزۋشىنىڭ اتا-اناسى جاۋاپقا تارتىلادى.