الماتىدا داۋ-داماي ءورشىپ تۇر: ءمۇعالىم مەكتەپتە تەرەزە جۋىپ جاتقان ۆيدەوسىن جاريالاپ، پەداگوگتاردى وقۋ جىلى باستالماي تۇرىپ ءۇي-جايدى تازالاۋعا ماجبۇرلەيتىنىن ايتتى. ونىڭ ايتۋىنشا، مۇنداي جۇمىستان باس تارتۋ وقۋ جۇكتەمەسىنىڭ قىسقارۋىنا اكەلۋى مۇمكىن. وقۋ ورنىندا تەكسەرۋ باستالدى، دەپ حابارلايدى infohub.kz.
ايەلدىڭ ايتۋىنشا، مۇعالىمدەر جاڭا وقۋ جىلىنا كابينەتتەردى دايىنداۋ ءۇشىن تامىز ايىندا-اق جۇمىسقا شىعۋعا ءماجبۇر. جاريالانعان كادرلاردا ونىڭ مەكتەپ تەرەزەسىن ءوز قولىمەن جۋىپ جاتقانى كورىنەدى. پەداگوگتىڭ سوزىنشە، بۇل جۇمىستان باس تارتقان جاعدايدا باسشىلىق سانكسيا قولدانۋى مۇمكىن — مىسالى، وقۋ ساعاتتارىنىڭ سانىن ازايتۋ. سونىمەن قاتار، ونىڭ ايتۋىنشا، بۇرىن مۇعالىمدەر مەكتەپتى جوندەۋگە ءوز اقشاسىن تاپسىرۋعا ءماجبۇر بولعان.
«كۋرسيۆ» باسىلىمى الماتى قالالىق ءبىلىم باسقارماسىنا جۇگىنگەننەن كەيىن ارنايى مونيتورينگتىك توپ قۇرىلىپ، ول مەكتەپكە جىبەرىلدى. ۆەدومستۆو مالىمدەگەندەي: «تەكسەرۋ اياسىندا مۇعالىمدەر قۇرامى مەن مەكتەپتىڭ اكىمشىلىك-شارۋاشىلىق پەرسونالىنان ساۋالناما الىنىپ، بارلىق ءمان-جاي انىقتالادى جانە مۇعالىمدەردىڭ ەڭبەك مىندەتتەرىنە كىرمەيتىن جۇمىستارعا تارتىلۋى مۇمكىن دەگەن اقپارات تەكسەرىلەدى». تەكسەرۋ ناتيجەلەرى مەن ىقتيمال شارالار تۋرالى قوسىمشا حابارلاۋعا ۋادە بەردى. جاعدايدى ءبىلىم باسقارماسىنىڭ باسشىسى جەكە باقىلاۋىنا الدى.
ايتا كەتۋ كەرەك، قازاقستاندا پەداگوگتاردى ءوز مىندەتتەرىنە جاتپايتىن جۇمىستاردان قورعاۋ ماسەلەسى مەملەكەتتىك دەڭگەيدە بىرنەشە رەت كوتەرىلدى. «پەداگوگ مارتەبەسى تۋرالى» زاڭ مۇعالىمدەردى كاسىبي مىندەتتەرىنە جاتپايتىن جۇمىس تۇرلەرىنە تارتۋعا شەكتەۋ قويادى. پرەزيدەنت قاسىم-جومارت توقايەۆ تا پەداگوگتاردىڭ قۇقىقتارىن ساقتاۋدى جانە ولاردى نەگىزگى جۇمىسىنان الشاقتاتپاۋدى بىرنەشە رەت تالاپ ەتتى.