الماتى وبلىسىندا قۇرامىندا 17 ادام بار ۇيىمداسقان قىلمىستىق توپقا سوت ۇكىمى شىقتى. ولار 800-دەن استام كولىك قۇرالىن زاڭسىز تىركەۋمەن اينالىسقان. ءاربىر ايىپتالۋشىنىڭ قىلمىسقا قاتىسۋ دارەجەسىنە قاراي سوت 2 جىلدان 11 جىلعا دەيىن باس بوستاندىعىنان ايىرۋ جازاسىن تاعايىندادى، دەپ حابارلايدى infohub.kz.
قارجىلىق مونيتورينگ اگەنتتىگىنىڭ مالىمەتىنشە، مەملەكەتكە تولەنبەگەن جالپى سوما 6،6 ميلليارد تەڭگەدەن استى. ءقما-نىڭ الماتى وبلىسى بويىنشا دەپارتامەنتى جۇرگىزگەن تەرگەۋ بارىسىندا قىلمىستىق توپ ەكى جىل بويى بەلگىلەنگەن تالاپتاردى اينالىپ ءوتىپ، كولىكتەردى زاڭسىز تىركەۋدى قامتاماسىز ەتكەنى انىقتالدى.
العاشقى كەزەڭدە سحەماعا قاتىسۋشىلار تەحنيكالىق رەگلامەنت تالاپتارىن بۇزىپ، قازاقستانعا اكەلىنگەن 642 جۇك كولىگىن زاڭسىز تىركەگەن. كەيىن قىلمىستىق ارەكەت جەڭىل كولىكتەرگە قاتىستى جالعاسقان: «كوشىرمەلەردى جانداندىرۋ» دەپ اتالاتىن سحەما بويىنشا زاڭسىز اكەلىنگەن كولىكتەرگە بۇرىن قازاقستاندا تىركەلگەن جانە ەسەپتەن شىعارىلعان كولىكتەردىڭ VIN-كودتارى بەرىلگەن. وسىلايشا تاعى 209 كولىك تىركەلگەن.
زاڭسىز سحەماعا پوليسيا قىزمەتكەرلەرى، ارنايى حقكو قىزمەتكەرلەرى جانە جەكە نوتاريۋستار قاتىسقان. ولار اقپاراتتىق جۇيەلەرگە جالعان مالىمەتتەر ەنگىزىپ، جالعان ادامدارعا سەنىمحاتتار رەسىمدەگەن. تولەنبەگەن تىركەۋ الىمى 5،4 ميلليارد تەڭگەنى، ال ۋتيليزاسيالىق الىم 1،2 ميلليارد تەڭگەنى قۇراعان.
تەرگەۋ بارىسىندا كولىك يەلەرى باستاپقى تىركەۋ الىمدارىن ءوز ەركىمەن تولەگەن، ناتيجەسىندە مەملەكەتكە 1 ميلليارد تەڭگەدەن استام قاراجات وتەلگەن. سونىمەن قاتار، سوت ۇكىمىمەن سوتتالعانداردىڭ قىلمىستىق جولمەن تاپقان اقشاعا ساتىپ العان بەس كولىگى مەملەكەت كىرىسىنە تاركىلەندى.
ءتورت بۇرىنعى پوليسيا قىزمەتكەرى ارناۋلى اتاعىنان ايىرىلدى. قاتىسى بار نوتاريۋستارعا سوت نوتارياتتىق قىزمەتپەن اينالىسۋعا تىيىم سالدى. سوت ۇكىمى زاڭدى كۇشىنە ەنگەن جوق.