الماتى وبلىسىندا القابيلەر سوتى كۇيەۋىن ءولتىردى دەپ ايىپتالعان ايەلگە قاتىستى اقتاۋ ۇكىمىن شىعاردى. قايعىلى وقيعا 2026 جىلدىڭ 1 مامىرىندا بولعان، دەپ حابارلايدى infohub.kz.
الماتى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتىنىڭ مالىمەتىنشە، ەرلى-زايىپتىلار اراسىندا تۇرعىلىقتى جەرى بويىنشا جانجال شىققان. جانجال بارىسىندا ايەل كۇيەۋىنە اس ءۇي پىشاعىمەن جۇرەك تۇسىنان ءبىر رەت سوققى جاساعان، سونىڭ سالدارىنان ول وقيعا ورنىندا قايتىس بولعان. وعان قازاقستان رەسپۋبليكاسى قىلمىستىق كودەكسىنىڭ 99-بابىنىڭ 1-بولىگى (كىسى ءولتىرۋ) بويىنشا ايىپ تاعىلعان.
قىلمىستىق ءىس القابيلەر القاسىنىڭ قاتىسۋىمەن قارالدى. سوت تالقىلاۋى بارىسىندا تاراپتار ۇسىنعان بارلىق دالەلدەمەلەر جان-جاقتى جانە وبەكتيۆتى تۇردە زەرتتەلدى. ءىستى قاراۋ قورىتىندىسى بويىنشا القابيلەر ايىپتالۋشىنىڭ تاعىلعان قىلمىستى جاساۋدا كىناسىزدىگى تۋرالى ۇكىم شىعاردى. وسى ۇكىمنىڭ نەگىزىندە سوت ك.-نى تاعىلعان ايىپ بويىنشا كىناسىز دەپ تانىپ، اقتاۋ ۇكىمىن شىعاردى.
سوت سونداي-اق اقتالعان ايەلگە قاتىستى بۇرىن تاڭدالعان كۇزەتپەن ۇستاۋ تۇرىندەگى بۇلتارتپاۋ شاراسىن كۇشىن جويدى. جابىرلەنۋشى تاراپتىڭ مورالدىق جانە ماتەريالدىق زياندى ءوندىرىپ الۋ تۋرالى ازاماتتىق تالابى قاناعاتتاندىرىلماي قالدى. پروسەستىك شىعىندار مەملەكەت ەسەبىنە جات قىزىلدى.
ۇكىم زاڭدى كۇشىنە ەنبەگەن جانە زاڭدا بەلگىلەنگەن تارتىپپەن شاعىمدالۋى مۇمكىن.