الماتى وبلىسىندا قۇتقارۋشىلار بيىكتىگى 4464 مەتردە تاۋ اۋرۋىنا شالدىققان رەسەيلىك ءتۋريستى ەۆاكۋاسيالادى. وقيعا سگۋ (سۆەردلوۆ مەملەكەتتىك ۋنيۆەرسيتەتى) شىڭىنا شىعۋ كەزىندە بولعان، دەپ حابارلايدى infohub.kz سايتى.
التى ادامنان تۇراتىن توپ — ءۇش ەر جانە ءۇش ايەل — شىڭعا شىعىپ بارا جاتقاندا، قاتىسۋشىلاردىڭ ءبىرى كەنەتتەن اۋىرىپ قالدى. تۋريستەر Garmin سپۋتنيكتىك بايلانىس قۇرىلعىسى ارقىلى قۇتقارۋشىلارعا حابارلاسىپ، ناقتى كوورديناتتارىن جەتكىزگەن.
الماتى اكىمدىگىنىڭ مونيتورينگ جانە جەدەل ارەكەت ەتۋ ورتالىعى، «بارىس» رەسپۋبليكالىق قۇتقارۋ جاساعى جانە تجم «قازاۆياقۇتقارۋ» اق تىكۇشاق ەكيپاجى دەرەۋ كومەككە جەتتى.
«قۇتقارۋشىلار 1992 جىلى تۋعان رەسەي ازاماتىن ەۆاكۋاسيالادى. تجم تىكۇشاعى ونى №4 قالالىق كلينيكالىق اۋرۋحانا الاڭىنا جەتكىزىپ، دارىگەرلەرگە تاپسىردى. توپتىڭ قالعان مۇشەلەرى ەۆاكۋاسيادان باس تارتىپ، جولدى ءوز بەتىنشە جالعاستىردى»، — دەپ حابارلادى تجم.
الدىڭعى كۇنى الماتى وبلىسىندا تاعى ءبىر رەسەيلىك تۋريستەر توبىنا قۇتقارۋ تىكۇشاعىنىڭ كومەگى قاجەت بولدى. ولار 3510 مەتر بيىكتىكتەن ەۆاكۋاسيالاندى. تاۋداعى تاس قۇلاۋىنان كەيىن 25 جاستاعى قىز باسىنان جاراقات السا، 32 جاستاعى ەر ادام قۇلاپ، قولىن زاقىمداعان. اۋا رايىنىڭ قولايسىزدىعىنا بالانىستى قۇتقارۋشىلار الدىمەن جاياۋ جەتۋگە ءماجبۇر بولدى، سودان كەيىن اۆياسيانى قوسقان.
تجم بيىك تاۋلى مارشرۋتتارعا شىعار الدىندا دەنساۋلىق جاعدايىن الدىن الا باعالاۋ، اۋا رايى مەن اككليماتيزاسيا ەرەكشەلىكتەرىن ەسكەرۋ، سونداي-اق توتەنشە جاعدايلارعا ارنالعان سەنىمدى بايلانىس قۇرالدارىن الۋ قاجەتتىگىن ەسكەرتەدى.