الماتى وبلىسىندا ۇلى قازاق اقىنى جامبىل جاباەۆتىڭ تۋعانىنا 180 جىل تولۋىنا ارنالعان حالىقارالىق بايگە ءوتتى. جارىسقا قازاقستاننىڭ تۇكپىر-تۇكپىرىنەن جانە قىرعىز رەسپۋبليكاسىنان 150-دەن استام شاباندوز قاتىستى. سپورتشىلار ءتورت ديسيپلينا بويىنشا سىنعا ءتۇستى: قۇنان بايگە، توپ بايگە، باتاقۇر بايگە جانە الامان بايگە. جەڭىمپازدار مەن جۇلدەگەرلەرگە كولىكتەر مەن اقشالاي سىيلىقتار تابىس ەتىلدى، دەپ حابارلايدى infohub.kz سايتى.
ەڭ ۇزاق قاشىقتىقتا — 25 شاقىرىمدىق الامان بايگەدە — «كوكسيرەك» اتتى جىلقىمەن پاۆلودار وكىلى دامير يلەسبەك ءبىرىنشى بولىپ مارەگە جەتتى. جەڭىمپازعا باس جۇلدە — ROX اۆتوكولىگى بەرىلدى. جىلقىنىڭ يەسى — يەمبەرگەن كۋانتايەۆ، جاتتىقتىرۋشىسى — قانات دولوتباكوۆ.
ەكىنشى ورىندى جامبىل وبلىسىنىڭ وكىلى الماسحان بازىربەك «باكتورى» اتتى جىلقىمەن يەلەنىپ، 2 ملن تەڭگەگە لايىق بولدى. ءۇشىنشى بولىپ استانادان مانسۋر اليجان «كەمەنگەر» اتتى جىلقىمەن مارەگە جەتىپ، وعان 1،5 ملن تەڭگە تابىستالدى. ءتورتىنشى ورىندى جامبىل اۋدانىنىڭ كوكباستاۋ اۋىلىنان ءامىر سەرالى «جەلقوڭىر» اتتى جىلقىمەن الدى.
16 شاقىرىمدىق توپ بايگەدە الماتى وبلىسىنىڭ بالقاش اۋدانىنىڭ وكىلى مەرەي گاريپۋللين «وردا» اتتى جىلقىمەن جەڭىسكە جەتتى. باس جۇلدە — Hyundai Palisade اۆتوكولىگى. جىلقىنىڭ يەسى — التىنباي قاسىم، جاتتىقتىرۋشىسى — جامبىل بوبەكباي.
الماتى وبلىسىنىڭ قاراساي اۋدانىنىڭ وكىلى ءادىلجان اسحات ۇلى «سەكرەت» اتتى جىلقىمەن ەكىنشى ورىن الىپ، 1،5 ملن تەڭگە الدى. ءۇشىنشى بولىپ الماتىدان احمەت ارنۇر «توبىلعى تورى» اتتى جىلقىمەن مارەگە جەتىپ، 1 ملن تەڭگە جەڭىپ الدى. ءتورتىنشى ورىندى جامبىل اۋدانىنىڭ ۇزىناعاش اۋىلىنان بەيبارىس تورەحان «ابادانزور» اتتى جىلقىمەن يەلەندى.
11 شاقىرىمدىق قۇنان بايگەدە الماتى وبلىسىنىڭ بالقاش اۋدانىنىڭ وكىلى ايسۇلتان سامات ۇلى «باككارا» اتتى جىلقىمەن ءبىرىنشى بولىپ مارەگە جەتتى. جەڭىمپازعا Changan X5 اۆتوكولىگىنىڭ كىلتتەرى سىيعا تارتىلدى. جىلقىنىڭ يەسى — نازار التىنباي، جاتتىقتىرۋشىسى — جامبىل بوبەكباي.
ەكىنشى ورىندى «ەركەجىرەن» اتتى جىلقىمەن ەرسۇلتان جارقىن يەلەنىپ، 1 ملن تەڭگە الدى. ءامىر سەرالى «سۇلۋ قاسقا» اتتى جىلقىمەن ءۇشىنشى بولىپ مارەگە جەتىپ، 700 مىڭ تەڭگە جەڭىپ الدى. قىرعىز رەسپۋبليكاسىنىڭ وكىلى ۇمار تالانتوۆ «بايلا» اتتى جىلقىمەن ءتورتىنشى ورىندى، ال جەتىسۋ وبلىسىنان دارىن بەرىش «بايراق» اتتى جىلقىمەن بەسىنشى ورىندى الدى.
باتاقۇر بايگەدە استانادان سەرجان باقىتباي «بومارو» اتتى جىلقىمەن جەڭىسكە جەتتى. جىلقىنىڭ يەسى ءارى جاتتىقتىرۋشىسى — نۇرجىگىت تابىلدييەۆ. ەكىنشى ورىندى جامبىل اۋدانىنىڭ اقاينار اۋىلىنان تەمىرلان ايدارحانوۆ «گاۋحارتاس» اتتى جىلقىمەن الدى. ءۇشىنشى بولىپ پاۆلودار وكىلى دامير يلەسبەك «تارلان» اتتى جىلقىمەن مارەگە جەتتى.
حالىقارالىق بايگەمەن قاتار قازاق كۇرەسى، اسىق اتۋ، لاڭگى ويىنى، قول كۇرەسى جانە گير سپورتى بويىنشا وبلىستىق تۋرنيرلەر ءوتتى. بارلىعى سپورتتىق جارىستارعا 300-دەن استام ادام قاتىستى.
حالىقارالىق بايگە ۇلى قازاق اقىنى جامبىل جاباەۆتىڭ 180 جىلدىعىنا ارنالعان مەرەيتويلىق ءىس-شارالار اياسىندا ۇيىمداستىرىلدى.