الماتىدا ايەلدى قۋدالاپ، قارۋعا ۇقسايتىن زاتپەن قورقىتقان جۇرگىزۋشى ۇستالدى. وقيعا ءوتىپ بارا جاتقانداردىڭ كوز الدىندا بولىپ، الەۋمەتتىك جەلىلەردە تاراعان ۆيدەوعا ءتۇسىپ قالعان، دەپ حابارلايدى infohub.kz.
زارداپ شەككەن ايەلدىڭ ايتۋىنشا، بەيتانىس ەر ادام ونى دوستىق كوشەسىنەن ءال-فارابي داڭعىلىنا دەيىن قۋدالاعان. سودان كەيىن ول Esentai ساۋدا ورتالىعىنىڭ تۇراعىنا كىرگەندە، جۇرگىزۋشى ونىڭ جولىن كەسىپ، ءىرى كاليبرلى تاپانشاعا نەمەسە اۆتوماتقا ۇقسايتىن زاتتى وعان باعىتتاعان.
«ونىڭ نە ويلاعانىن بىلمەيمىن. بۇل انىق اۋرۋ نەمەسە ماس ادامنىڭ ارەكەتى»، — دەپ جازدى الماتىلىق ايەل، قۇقىق قورعاۋ ورگاندارىن شارا قولدانۋعا شاقىردى.
الماتى پوليسياسى وقيعانىڭ ۆيدەوسى الەۋمەتتىك جەلىلەردى مونيتورينگىلەۋ بارىسىندا انىقتالعانىن حابارلادى. مەدەۋ اۋدانى پوليسيا باسقارماسىنىڭ قىزمەتكەرلەرى كۇدىكتىنىڭ جەكە باسىن انىقتاپ، ونى ۇستاپ، بولىمشەگە جەتكىزگەن. كورسەتىلگەن زات ويىنشىق تاپانشا ەكەنى جانە اتىس قارۋىنا جاتپايتىنى انىقتالدى.
جۇرگىزۋشىگە قاتىستى ۇساق بۇزاقىلىق فاكتىسى بويىنشا اكىمشىلىك ءىس قوزعالىپ، ماتەريالدار سوتقا جىبەرىلدى. سونىمەن قاتار، جول قوزعالىسى ەرەجەلەرىن بۇزعانى ءۇشىن اكىمشىلىك حاتتاما تولتىرىلدى.
پوليسيا ءتىپتى ويىنشىق تاپانشانىڭ دا اينالاداعىلاردى قورقىتىپ، دۇربەلەڭ تۋدىرۋى مۇمكىن ەكەنىن اتاپ ءوتتى. «قوعامدىق ورىنداردا قارۋعا ۇقسايتىن زاتتاردى كورسەتۋگە جول بەرىلمەيدى، ءتىپتى ولار ويىنشىق بولسا دا»، — دەپ ەسكەرتتى پوليسيا.
الماتى پد قوسىمشا مالىمدەگەندەي، مۇنداي ارەكەتتەر قۇقىق قورعاۋ ورگاندارىنىڭ دەرەۋ ارەكەت ەتۋىن تالاپ ەتەدى.
بۇعان دەيىن الماتىدا پىشاق پەن گراناتاسى بار ەر ادامنىڭ ۇستالعانى حابارلانعان بولاتىن.