الماتىدا مەدەۋ اۋداندىق قىلمىستىق ىستەر جونىندەگى سوتى قىزمەتتەگى ارەكەتسىزدىگى ايىپتالعان پوليسيا قىزمەتكەرىنە ۇكىم شىعاردى. تەرگەۋ نۇسقاسى بويىنشا، ونىڭ ارەكەتسىزدىگى ال-فارابي داڭعىلىنداعى ولىمگە اكەلگەن جول اپاتىنا سەبەپ بولۋى مۇمكىن ەدى، دەپ حابارلايدى infohub.kz سايتى.
سۋديا سوتتالۋشىنى كىنالى دەپ تانىپ، وعان ەڭ تومەنگى قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەسىندە وتەيتىن 3،5 جىلعا باس بوستاندىعىنان ايىرۋ جازاسىن تاعايىندادى.
سونىمەن قاتار سوتتالعان ادامعا مەملەكەتتىك قىزمەتتە لاۋازىم اتقارۋعا ءومىر بويى تىيىم سالىندى، ول پوليسيا سەرجانتى اتاعىنان دا ايىرىلدى. قاماۋدا ۇستاۋ تۇرىندەگى بۇلتارتپاۋ شاراسى وعان وزگەرىسسىز قالدىرىلدى.
جازا مەرزىمى ەڭ تومەنگى قاۋىپسىزدىك دەڭگەيىندەگى مەكەمەدە باس بوستاندىعىنان ايىرۋ تۇرىندەگى جازانى وتەۋدىڭ ەكى كۇنىنە قاماۋدا ۇستاۋدىڭ ءبىر كۇنى ەسەبىنەن ەسەپتەلەدى.
بۇعان دەيىن الماتىدا قالالىق پوليسيا دەپارتامەنتى باستىعىنىڭ ەكس-ورىنباسارىنىڭ جۇرگىزۋشىسىنە قاتىستى سوت تالقىلاۋى باستالعان. ول قىزمەتتەگى ارەكەتسىزدىگى ايىپتالدى. تەرگەۋ نۇسقاسى بويىنشا، ونىڭ ارەكەتسىزدىگى ال-فارابي داڭعىلىندا ءۇش ادامنىڭ ءومىرىن قيعان ولىمگە اكەلگەن جكو-عا سەبەپ بولۋى مۇمكىن ەدى.
ەسكە سالايىق، 21 ناۋرىزعا قاراعان ءتۇنى الماتىداعى ال-فارابي داڭعىلىندا اۋىر جول اپاتى بولعان. پوليسيانىڭ مالىمەتىنشە، Zeekr كولىگى قارسى جولاققا شىعىپ كەتىپ، Mercedes-پەن سوقتىعىسقان. سالدارىنان Mercedes جۇرگىزۋشىسى مەن ونىڭ ەكى جولاۋشىسى وقيعا ورنىندا كوز جۇمدى.
22 ماۋسىمدا سۋديا سوتتالۋشىعا ۇكىم شىعارىپ، ونى كىنالى دەپ تانىدى جانە ەڭ تومەنگى قاۋىپسىزدىك دەڭگەيىندەگى قىلمىستىق-اتقارۋ جۇيەسى مەكەمەسىندە وتەيتىن 10 جىلعا باس بوستاندىعىنان ايىرۋعا، سونداي-اق كولىك قۇرالىن باسقارۋ قۇقىعىنان ءومىر بويى ايىرۋعا سوتتادى.