امەريكاندىق رەپەر كانە ۋەستتىڭ (Ye) 14 تامىزدان 15 تامىزعا اۋىستىرىلعان كونسەرتى الماتىدا تىنىش جانە وقىس وقيعاسىز ءوتتى، دەپ حابارلايدى infohub.kz سايتى.
كورەرمەندەردىڭ قاۋىپسىزدىگىن 2،5 مىڭعا جۋىق پوليسيا قىزمەتكەرى مەن ۇلتتىق ۇلان اسكەري قىزمەتشىلەرى قامتاماسىز ەتتى.
«ءبىز ءۇشىن باستى باسىمدىق ءاربىر قالا تۇرعىنى مەن قوناعىنىڭ قاۋىپسىزدىگىن قامتاماسىز ەتۋ بولدى. ءىس-شارا بارىسىندا پوليسيا قىزمەتكەرلەرى ۇلتتىق ۇلان اسكەري قىزمەتشىلەرىمەن بىرلەسىپ، قوعامدىق ءتارتىپ پەن جول جاعدايىن باقىلادى»، — دەدى الماتى پوليسيا دەپارتامەنتىنىڭ باستىعى ايدىن قابدۋلدينوۆ.
ول سونداي-اق الماتى تۇرعىندارى مەن قوناقتارىنا تارتىپتىلىگى، تۇسىنىستىگى جانە زاڭدى ساقتاعانى ءۇشىن العىس ءبىلدىردى.
«مۇنداي اۋقىمدى ءىس-شارالارداعى قاۋىپسىزدىك — ءتارتىپ ساقشىلارى مەن ازاماتتاردىڭ بىرلەسكەن ەڭبەگىنىڭ ناتيجەسى»، — دەدى الماتى پوليسياسىنىڭ باستىعى.
Yeء-دىڭ الماتىداعى ونەر كورسەتۋى ونىڭ قازاقستانداعى العاشقى ۇلكەن كونسەرتى بولدى. وعان بىرنەشە اپتا دايىندىق جاسالدى. ارەناعا Ye شوۋىنىڭ ەلەمەنتتەرىنىڭ ءبىرى — ۇلكەن سفەرالىق قۇرىلىم ورناتىلدى. ۇيىمداستىرۋشىلار الماتىعا 100 توننادان استام تەحنيكالىق جابدىق جەتكىزىلگەنىن دە حابارلادى.
باستاپقىدا شوۋ YE TOUR 2026 الەمدىك تۋرى اياسىندا 14 تامىزعا جوسپارلانعان ەدى. ۇيىمداستىرۋشىلار بۇعان دەيىن دايىندىق كەزەڭىندە ونەر كورسەتۋ كۇنى وزگەرگەنىن ايتقان بولاتىن: لوگيستيكا مەن تۋرداعى قالالاردىڭ كەزەكتىلىگى تۇزەتىلگەندىكتەن، ولار كونسەرتتى ءدال 14 تامىزدا وتكىزۋدى جەدەل كەلىسۋگە ءماجبۇر بولدى، الايدا قاۋىپسىزدىك ماقساتىندا كونسەرتتى 15 تامىزعا اۋىستىرۋعا تۋرا كەلدى.
ال قارساڭىندا الماتىدا جاپپاي ەلەكتر جارىعى سونگەندىكتەن ءىس-شارا كۇمان تۋدىرعان ەدى. كەيىن قالادا ەلەكترمەن جابدىقتاۋ قالپىنا كەلتىرىلە باستادى، الايدا مەگاپوليستى قولايسىز اۋا رايى شارپىدى، ۇيىمداستىرۋشىلار جاۋىن-شاشىن سالدارىنان ساحنا كۇمبەزى تايعاق بولىپ، ارتىسكە ونەر كورسەتۋ كەزىندە ءقاۋىپ ءتوندىرۋى مۇمكىن دەپ قاۋىپتەندى.