الماتىدا پوليسيا دەپارتامەنتىنىڭ باسشىلىعى مەن قىزمەتكەرلەرىنە ارنالعان ەكى كۇندىك جاساندى ينتەللەكت سەمينار-ترەنينگى ءوتتى، دەپ حابارلايدى infohub.kz سايتى.
وقىتۋدى ق. ساتبايەۆ اتىنداعى قازاق ۇلتتىق زەرتتەۋ تەحنيكالىق ۋنيۆەرسيتەتىنىڭ بازاسىنداعى سيفرلىق ۇكىمەتتى قولداۋ ورتالىعى ۇيىمداستىردى. كۋرس قاتىسۋشىلارى جاساندى ينتەللەكت نەگىزدەرىمەن، زاماناۋي تەحنولوگيالارمەن جانە ولاردىڭ دامۋ باعىتتارىمەن تانىسىپ، سونداي-اق ءجي-دى مەملەكەتتىك ورگاندار مەن قۇقىق قورعاۋ سالاسىندا قولدانۋ مۇمكىندىكتەرىن قاراستىردى.
پراكتيكالىق بولىككە ەرەكشە نازار اۋدارىلدى. ساباق بارىسىندا قىزمەتكەرلەر جاساندى ينتەللەكتتىڭ زاماناۋي قۇرالدارىن جانە ولاردى قىزمەتتىك، اناليتيكالىق جانە باسقارۋ مىندەتتەرىن شەشۋدە پايدالانۋ مۇمكىندىكتەرىن زەرتتەدى. قاتىسۋشىلار پراكتيكالىق جانە تاكتيكالىق كەيستەردى تالداپ، ءارتۇرلى جۇمىس جاعدايلارىن مودەلدەپ، ساراپشىلارعا سۇراق قويىپ، العان بىلىمدەرىن تىكەلەي پىسىقتادى.
«بۇگىن جاساندى ينتەللەكت جاي عانا زاماناۋي تەحنولوگيا ەمەس، قىزمەتتىك جۇمىستى ۇيىمداستىرۋ تاسىلدەرىن ايتارلىقتاي وزگەرتە الاتىن ءتيىمدى قۇرالعا اينالۋدا. پوليسيا ءۇشىن بۇل، ەڭ الدىمەن، ۇلكەن كولەمدەگى اقپاراتتى جىلدامىراق تالداۋ، باسقارۋ شەشىمدەرىنىڭ ساپاسىن ارتتىرۋ جانە جۇمىس پروسەستەرىن وڭتايلاندىرۋ مۇمكىندىگى. سوندىقتان ءبىزدىڭ مىندەتىمىز – قىزمەتكەرلەردى جي مۇمكىندىكتەرىمەن تانىستىرىپ قانا قويماي، وسى تەحنولوگيالاردى ساۋاتتى، جاۋاپكەرشىلىكپەن جانە ءىىو ەرەكشەلىگىن ەسكەرە وتىرىپ قولدانۋعا ۇيرەتۋ»، – دەپ اتاپ ءوتتى الماتى قالاسى پوليسيا دەپارتامەنتىنىڭ باستىعى، پوليسيا گەنەرال-مايورى ايدىن قابدۋلدينوۆ.
وقىتۋدىڭ جەكە بلوگى اناليتيكالىق جانە باسقارۋ مىندەتتەرىن شەشۋ ءۇشىن جاساندى ينتەللەكتتى پراكتيكالىق قولدانۋ ماسەلەلەرىنە ارنالدى. پوليسيا قىزمەتكەرلەرى جەكەلەگەن پروسەستەردى اۆتوماتتاندىرۋ، اقپاراتتى دايىنداۋ جانە تالداۋ، دەرەكتەرمەن جۇمىس ىستەۋ جانە ءارتۇرلى قىزمەتتىك جاعدايلاردا ءتيىمدى شەشىمدەردى ىزدەۋ مۇمكىندىكتەرىن قاراستىردى.
مۇنداي وقىتۋدى وتكىزۋ ىشكى ىستەر ورگاندارى قىزمەتكەرلەرىن كاسىبي دايارلاۋدىڭ جاڭا كەزەڭىنە اينالۋدا، ويتكەنى سيفرلىق قۇزىرەتتىلىكتەر مەن زاماناۋي تەحنولوگيالاردى ءتيىمدى پايدالانۋ داعدىلارى بىرتىندەپ كۇندەلىكتى قىزمەتتىك جۇمىستىڭ ءبىر بولىگىنە اينالۋدا، دەپ حابارلادى پوليسيادان.
ەكى كۇندىك كۋرس قورىتىندىسى بويىنشا قاتىسۋشىلار وقۋدى اياقتاعانىن راستايتىن سەرتيفيكاتتار الدى.