الماتىدا ساين كوشەسىنىڭ ءبىر بولىگىندە جىلدامدىق شەگى بۇرىنعى 80 كم/ساع ورنىنا 60 كم/ساع دەيىن تومەندەتىلدى. بۇل قالا اكىمدىگىندە راستالدى، دەپ حابارلايدى infohub.kz سايتى.
الماتى جۇرگىزۋشىلەرى ساين كوشەسىندەگى جىلدامدىق رەجيمىنىڭ وزگەرگەنىن بايقاپ، بۇل تۋرالى الەۋمەتتىك جەلىلەردە حابارلادى. اكىمدىكتە بۇل شەكتەۋدىڭ ماگيسترالدىڭ ءبىر بولىگىندە شىنىمەن ەنگىزىلگەنىن راستادى.
الماتى قالاسىنىڭ جول قوزعالىسىن ۇيىمداستىرۋ جانە جولاۋشىلار كولىگى باسقارماسىندا تۇسىندىرگەندەي، وزگەرىستەر ساين كوشەسىنىڭ رىسقۇلوۆ داڭعىلىنان تولە بي كوشەسىنە دەيىنگى بولىگىن قامتىدى.
«ساين كوشەسىندە رىسقۇلوۆ داڭعىلىنان تولە بي كوشەسىنە دەيىنگى ۋچاسكەدە مارشرۋتتىق كولىك قۇرالدارىنىڭ قوزعالىسىنا ارنالعان بولەك جولاقتى ۇيىمداستىرۋ بويىنشا ءىس-شارالاردى ىسكە اسىرۋ اياسىندا جول قوزعالىسىن ۇيىمداستىرۋ سحەماسى تۇزەتىلدى»، — دەپ ءتۇسىندىردى باسقارمادا.
ۆەدومستۆو قولدانىستاعى جولاقتاردىڭ ەنىن قايتا ءبولۋ ناتيجەسىندە ءتورت جولاقتى ۇيىمداستىرۋعا قول جەتكىزىلگەنىن اتاپ ءوتتى.
«بەكىتىلگەن سحەماعا سايكەس قولدانىستاعى جولاقتاردىڭ ەنىن قايتا ءبولۋ جۇمىستارى جۇرگىزىلدى، بۇل ءتورت جولاقتى ۇيىمداستىرۋعا مۇمكىندىك بەردى»، — دەپ حابارلادى باسقارمادا.
جىلدامدىق رەجيمىنىڭ وزگەرۋ سەبەبى دە ءتۇسىندىرىلدى.
«جول قوزعالىسى قاۋىپسىزدىگىن ارتتىرۋ ماقساتىندا جانە ساين كوشەسىنىڭ رايىمبەك داڭعىلى جانە تولە بي كوشەسىمەن قيىلىستارىنداعى كىرۋ-شىعۋ جولدارىن قامتيتىن كولىك ايرىقتارىنىڭ ەرەكشەلىكتەرىن ەسكەرە وتىرىپ، اتالعان ۋچاسكەدە ماكسيمالدى جىلدامدىق 60 كم/ساع دەيىن شەكتەلدى»، — دەلىنگەن باسقارما جاۋابىندا.