الماتىدا وتكەن دەمالىس كۇندەرى پوليسيا قىزمەتكەرلەرى جول قوزعالىسى ەرەجەلەرىنىڭ جۇزدەگەن بۇزۋشىلىقتارىن انىقتادى. موپەد، ساموكات جانە باسقا دا جەكە موبيلدىلىك قۇرالدارىنىڭ جۇرگىزۋشىلەرىنە ەرەكشە نازار اۋدارىلدى، دەپ حابارلايدى infohub.kz سايتى.
مەگاپوليستە اپاتتىلىقتى تومەندەتۋگە جانە جول قوزعالىسى ەرەجەلەرىن ورەسكەل بۇزۋشىلىقتاردىڭ جولىن كەسۋگە باعىتتالعان پروفيلاكتيكالىق رەيدتەر جالعاسۋدا. پوليسيا دەپارتامەنتىندە اتاپ وتكەندەي، ارنايى تۇراقتارعا 3 موپەد، 298 ساموكات، 1 ەلەكتروۆەلوسيپەد جانە 1 موتوسيكل قويىلدى.
قالانىڭ جەتىسۋ اۋدانىندا جول ەرەجەلەرىنىڭ 152 بۇزۋشىلىعى تىركەلدى. ولاردىڭ ءبىر بولىگى كولىك قۇرالدارىن پايدالانۋعا جانە جولاۋشىلاردى تاسىمالداۋعا قاتىستى.
الماتى پوليسيا دەپارتامەنتى باستىعىنىڭ ورىنباسارى عالىم سارعۇلوۆ: «جولداعى قاۋىپسىزدىك ءاربىر جول قوزعالىسىنا قاتىسۋشىنىڭ تارتىبىنە تىكەلەي بايلانىستى. سوندىقتان ءبىزدىڭ مىندەتىمىز – جول-كولىك وقيعاسىنا اكەلۋى مۇمكىن بۇزۋشىلىقتاردى ۋاقىتىلى انىقتاۋ جانە ولاردىڭ سالدارىنا جول بەرمەۋ. باقىلاۋ تۇراقتى نەگىزدە، اسىرەسە قوزعالىس قارقىندى جانە اپاتتىلىق دەڭگەيى جوعارى ۋچاسكەلەردە جالعاسادى. جۇرگىزۋشىلەردى جول قوزعالىسى ەرەجەلەرىن قاتاڭ ساقتاۋعا، ءوز ءومىرىڭىز بەن اينالاڭىزداعىلاردىڭ قاۋىپسىزدىگىن قاتەرگە تىكپەۋگە شاقىرامىز»، – دەدى.