الماتى تاۋلارىنداعى سەۆەرسوۆ مۇزدىعىنان تەڭىز دەڭگەيىنەن شامامەن 4،3 مىڭ مەتر بيىكتىكتەن ءالپينيستىڭ ءمايىتى تابىلدى. قۇتقارۋشىلار مەن پوليسيا ونى ەۆاكۋاسيالاۋ جوسپارىن ازىرلەپ جاتىر، دەپ حابارلايدى infohub.kz سايتى.
الماتى تجد ماماندارى ءمايىتتى ءتۇسىرۋ جۇمىستارىن قالاي جۇرگىزۋ كەرەكتىگىن انىقتاپ جاتىر. بيىك تاۋلى ايماق پەن قولجەتىمسىز جەرگە بايلانىستى ول جەرگە جەتۋ وڭاي ەمەس.
«قازىرگى ۋاقىتتا پوليسيا قىزمەتكەرلەرىنە سەۆەرسوۆ مۇزدىعىنان تەڭىز دەڭگەيىنەن شامامەن 4300 مەتر بيىكتىكتەن ءمايىتتى تۇسىرۋگە كومەك كورسەتۋ بويىنشا ۇيىمداستىرۋ شارالارى قابىلدانۋدا. جۇمىستاردى جۇرگىزۋ جەردىڭ قولجەتىمسىزدىگى مەن بيىك تاۋلى ايماقتىڭ كۇردەلى جاعدايلارىنا بايلانىستى قيىنداپ تۇر»، — دەپ حابارلادى تجد-دان.
قۇتقارۋشىلار ودان ءارى ارەكەتتەردى پوليسيامەن قاجەتتى راسىمدەر مەن قاۋىپسىزدىك تالاپتارىن ەسكەرە وتىرىپ كەلىسۋدە.
بۇعان دەيىن مۇزدىقتان ادام سۇيەگىنىڭ قالدىقتارىن بەلارۋس تۋريستەرى تاپقانى حابارلانعان بولاتىن. بۇل تۋرالى Facebook-تە اناستاسيا احمەتوۆا جازدى.
ونىڭ ايتۋىنشا، 16 تامىزدا ونىڭ تانىستارى تاۋداعى ەكى اپتالىق جورىقتى اياقتاپ، تۇسكەننەن كەيىن مۇزدىقتا كورگەندەرىن ايتىپ بەرگەن. تۋريستەر ورىندى فوتوعا جانە بەينەگە ءتۇسىرىپ، كوورديناتتارىن ساقتاپ قويعان.
احمەتوۆا 112 قىزمەتىنە قوڭىراۋ شالا الماعانىن ايتتى. وسىدان كەيىن اقپارات 109 قىزمەتى ارقىلى بەرىلىپ، كوورديناتتار، فوتوسۋرەتتەر مەن بەينەجازبالار WhatsApp ارقىلى جەدەل قىزمەتتەرگە جىبەرىلگەن.
ەندى ءمايىتتى مۇزدىقتان تۇسىرۋگە تجد قىزمەتكەرلەرى پوليسيامەن بىرلەسىپ دايىندالۋدا.