الماتىدا جەتى جاسار بالا سكورپيوننىڭ شاعۋىنان زارداپ شەكتى. وقيعا اۋلادا ويناپ جۇرگەن كەزدە بولعان، دەپ حابارلايدى infohub.kz سايتى.
بالانىڭ اناسى الەۋمەتتىك جەلىدە ايتقانداي، ۇلىنىڭ باس بارماعىنىڭ جاستىقشاسىنان شاعىپ العان. وتباسى دەرەۋ جەدەل جاردەم شاقىرىپ، مەديسينالىق كومەككە جۇگىنگەن. ماناس كوشەسىندەگى بالالار جۇقپالى اۋرۋلار اۋرۋحاناسىندا دارىگەرلەر ولاردا قارسى ۋ مەن ارنايى ەكپە جوق ەكەنىن ايتىپ، باقىلاۋ ءۇشىن رەانيماسياعا جاتقىزۋدى ۇسىنعان. الايدا بالا اۋرۋحانادا جالعىز قالۋدان قورقىپ، اتا-اناسىنىڭ باقىلاۋىمەن ۇيدە قالدىرىلعان. اناسىنىڭ ايتۋىنشا، ساۋساق ىسىنگەن، تەمپەراتۋرا ءبىر رەت كوتەرىلگەن، ءبىراق وزدىگىنەن قالپىنا كەلگەن.
الماتى قوعامدىق دەنساۋلىق ساقتاۋ باسقارماسى ءوتىنىشتى راستادى. بالا بالالار شۇعىل مەديسينالىق كومەك ورتالىعىنىڭ قابىلداۋ بولىمشەسىنە جەتكىزىلگەن. قاراپ تەكسەرۋ كەزىندە دارىگەرلەر اۋىرسىنۋدى، ساۋساقتىڭ ورتاشا ءىسىنۋىن، قىزارۋىن، جالپى السىزدىكتى جانە 37،1 گرادۋس تەمپەراتۋرانى انىقتاعان. رەانيماتولوگ پەن حيرۋرگتىڭ كەڭەسىنەن كەيىن سكورپيون ۋىنىڭ ۋىتتى اسەرىنە بايلانىستى رەانيماسيا جانە قارقىندى تەراپيا بولىمشەسىنە جاتقىزۋ ۇسىنىلعان. دياگنوز — سكورپيون ۋىنىڭ ۋىتتى اسەرى، جاعدايى ورتاشا اۋىرلىقتا.
الايدا اتا-انا زاڭدى وكىلدەر رەتىندە اۋرۋحاناعا جاتقىزۋدان باس تارتىپ، قولحاتپەن بالانى ۇيگە الىپ كەتكەن. دارىگەرلەر ىقتيمال سالدارلار مەن اسقىنۋ ءقاۋپى تۋرالى ەسكەرتىپ، جاعداي ناشارلاسا دەرەۋ كومەككە جۇگىنۋدى ۇسىنعان.
باسقارمادا اتاپ وتكەندەي، 2026 جىلدىڭ جازعى ماۋسىمىنىڭ باسىنان بەرى بۇل الماتىداعى بالالار شۇعىل كومەك ورتالىعىندا تىركەلگەن سكورپيون شاعۋدىڭ العاشقى جاعدايى.