الماتىدا 1 قازاننان باستاپ سۋمەن جابدىقتاۋ جانە سۋ بۇرۋدىڭ جاڭا تاريفتەرى كۇشىنە ەنەدى. NUR.KZ اگەنتتىگى «الماتى سۋ» كومپانياسىنا سىلتەمە جاساپ حابارلاۋىنشا، مەگاپوليس تۇرعىندارى ءۇشىن قوسىلعان قۇن سالىعىن قوسا ەسەپتەگەندە ءبىر تەكشە مەتر سۋ 178،06 تەڭگە تۇرادى، دەپ جازادى infohub.kz سايتى.
«الماتى سۋ» تاريفتەرى تۇتىنۋشى ساناتىنا تىكەلەي بايلانىستى. حالىق ءۇشىن سۋمەن جابدىقتاۋ قۇنى ءبىر تەكشە مەترگە 178،06 تەڭگە، ال سۋ بۇرۋ — 119،46 تەڭگە بولادى.
بيزنەس ءۇشىن جوعارىراق تاريف بەلگىلەنگەن. زاڭدى تۇلعالارعا سۋ ءبىر تەكشە مەترگە 362،18 تەڭگە، ال سۋ بۇرۋ — 264،75 تەڭگە تۇرادى. وسىلايشا، ەكى قىزمەت بىرگە بيزنەسكە ءبىر تەكشە مەترگە 626،93 تەڭگەگە شىعادى.
مەملەكەتتىك مەكەمەلەر مەن كاسىپورىندارعا، سونداي-اق مەملەكەتكە داۋىس بەرەتىن اكسيالاردىڭ نەمەسە قاتىسۋ ۇلەستەرىنىڭ كەمىندە جارتىسى تيەسىلى ۇيىمدارعا جەكە مولشەرلەمە قاراستىرىلعان. «بۇل سانات ءۇشىن ققس-پەن ءبىر تەكشە مەتر سۋ 649،60 تەڭگە، سۋ بۇرۋ — 189،14 تەڭگە تۇرادى. جالپى العاندا — ءبىر تەكشە مەترگە 838،74 تەڭگە»، — دەلىنگەن سايتتا.
ەسەپتەگىشى جوق تۇتىنۋشىلار ءۇشىن سۋ بۇرۋ قۇنى بولەك ەسەپتەلەدى. «سۋىق سۋدى بۇرۋ ءتاريفى ادام باسىنا ايىنا 1791،85 تەڭگە، ىستىق سۋدىكى — 376،29 تەڭگە. ەسەپتەگىش ورناتۋ تەحنيكالىق مۇمكىن ەمەس ەسكى جانە اپاتتى ۇيلەر مەن جاتاقحانالاردىڭ تۇرعىندارى ءۇشىن بۇل قىزمەت ادام باسىنا 641،48 تەڭگەگە شىعادى. ەسەپتەگىشى جوق ادام ءۇشىن تۇرمىستىق سۋىق سۋمەن جابدىقتاۋ سۋىق سۋدى بۇرۋمەن بىرگە ققس-پەن ايىنا 4462،75 تەڭگە بولادى»، — دەپ كورسەتىلگەن «الماتى سۋ» كەستەسىندە.
باقشا، گازون، گۇلزارلار مەن اعاشتاردى سۋارۋ ءۇشىن دە جەكە نورماتيۆ بەلگىلەنگەن. 1 قازاننان باستاپ ول سۋارۋ الاڭىنىڭ ءبىر ءجۇز شارشى مەترىنە ايىنا ققس-پەن 1780،60 تەڭگە بولادى.
ايتا كەتەيىك، سۋارۋ ماۋسىمى التى ايعا سوزىلادى — 15 ساۋىردەن 15 قازانعا دەيىن. سۋارۋعا سۋدى 23:00-دەن 05:00-گە دەيىن پايدالانۋعا رۇقسات ەتىلەدى.