الماتى تاۋلارىندا 1953 جىلى تۋعان جوعالعان شەتەلدىك ازاماتتى ىزدەۋ جالعاسۋدا: ىزدەۋگە قاتىسۋشىلار سانى شامامەن 50-دەن 130 ادامعا، ال دروندار سانى جەتىدەن 11-گە دەيىن ۇلعايتىلدى. جۇمىستار تاۋلىك بويى جۇرگىزىلۋدە، دەپ حابارلايدى infohub.kz سايتى.
توتەنشە جاعدايلار مينيسترلىگىنىڭ مالىمەتىنشە، ىزدەۋ جۇمىستارى مەدەۋ اۋدانىنداعى تالعار اسۋى ماڭىندا، شامامەن 3200 مەتر بيىكتىكتە شوعىرلانعان. وقيعا ورنىندا شتاب قۇرىلىپ، وپەراسيانى الماتى قالاسىنىڭ توتەنشە جاعدايلار دەپارتامەنتىنىڭ باسشىلىعى ۇيلەستىرۋدە.
ىزدەۋ توپتارى قولجەتىمسىز ۋچاسكەلەردى، شاتقالداردى، بەتكەيلەردى جانە اسۋلار مەن شىڭدارعا قاراي باعىتتالعان مارشرۋتتاردى تىنتۋدە. سونىمەن قاتار ىزدەۋ ايماعىنداعى سۋ قويمالارىنىڭ اكۆاتورياسى تەكسەرىلدى. قۇتقارۋشىلار جاڭا ۋچاسكەلەردى تەكسەرۋدى جالعاستىرىپ، ىزدەۋ ايماعىن كەڭەيتۋدە.
وپەراسياعا تجم قىزمەتكەرلەرى، قالالىق مونيتورينگ جانە جەدەل دەن قويۋ ورتالىعى، «بارىس» رەسپۋبليكالىق قۇتقارۋ قىزمەتى، پوليسيا قىزمەتكەرلەرى، سونداي-اق دسس ەرىكتىلەرى تارتىلدى. 130 ادام مەن 11 دروننان بولەك، سەگىز بىرلىك تەحنيكا، ءۇش كينولوگيالىق ەسەپ جانە تجم اۆياسياسى جۇمىلدىرىلدى.
جۇمىستى تاۋ رەلەفى، ايتارلىقتاي بيىكتىك جانە جەكەلەگەن ۋچاسكەلەردىڭ قولجەتىمسىزدىگى قيىنداتۋدا. اۋماقتى تەكسەرۋ رەلەف پەن اۋا رايى جاعدايلارىن ەسكەرە وتىرىپ، ۇزدىكسىز جۇرگىزىلۋدە.
بۇعان دەيىن «كۋرسيۆ» جازعانداي، 28 قىركۇيەكتە شەتەلدىك ازامات «شىمبۇلاق» ارقان جولىمەن توپپەن بىرگە كوتەرىلىپ، كەيىن قالاعا ءوز بەتىنشە ءتۇسۋدى شەشكەن. ول قوناقۇيگە ورالماعان. جوعالۋ تۋرالى حابارلاما «112» پۋلتىنە 29 قىركۇيەكتە ءتۇسىپ، سول كۇنى ىزدەۋ جۇمىستارى باستالعان.