الماتى تاۋلارىندا 1953 جىلى تۋعان شەتەلدىك ازاماتتى ىزدەۋ جالعاسىپ جاتىر. ول 28 قىركۇيەكتە «شىمبۇلاقتان» ءوز بەتىنشە تۇسپەك بولىپ، قوناقۇيگە ورالماعان. ىزدەۋ-قۇتقارۋ جۇمىستارىنا 50-گە جۋىق ادام، تىكۇشاق جانە جەتى درون جۇمىلدىرىلدى، دەپ حابارلايدى infohub.kz سايتى.
ىزدەۋ تالعار اسۋىنىڭ ماڭىندا، شامامەن 3200 مەتر بيىكتىكتە جۇرگىزىلىپ جاتىر. ۆەدومستۆو دەرەگىنشە، ەر ادام «شىمبۇلاق» ارقان جولىمەن توپ قۇرامىندا كوتەرىلگەن سوڭ، ارىپتەستەرىنە مارشرۋتتى جالعىز جالعاستىرىپ، قالاعا سۇيەمەلدەۋسىز تۇسەتىنىن ايتقان.
ونىڭ جوعالعانى تۋرالى حابار «112» پۋلتىنە 29 قىركۇيەكتە ءتۇستى. سول كۇنى توتەنشە جاعدايلار مينيسترلىگى ىزدەۋ-قۇتقارۋ جۇمىستارىن ۇيىمداستىردى. الماتىنىڭ توتەنشە جاعدايلار دەپارتامەنتى جەدەل شتاب قۇردى.
ىزدەۋگە تجم قىزمەتكەرلەرى، قالالىق مونيتورينگ جانە جەدەل دەن قويۋ ورتالىعى، «بارىس» رەسپۋبليكالىق قۇتقارۋ قىزمەتىنىڭ قۇتقارۋشىلارى، پوليسەيلەر، كينولوگيالىق ەسەپ توپتارى جانە «دسس» ەرىكتىلەرى تارتىلدى. بارلىعى سەگىز تەحنيكا بىرلىگى، جەتى ۇشقىشسىز ۇشۋ اپپاراتى، ءۇش كينولوگيالىق ەسەپ توبى جانە «قازاۆياسپاس» تىكۇشاعى پايدالانىلۋدا.
تىكۇشاق ەكيپاجى سولتۇستىك تالعار ماڭىنداعى، بوگدانوۆيچ مۇزدىعى مەن وعان ىرگەلەس شاتقالدارداعى تاۋ مارشرۋتتارىن شىڭدار مەن اسۋلار باعىتىندا تەكسەردى. جاياۋ توپتار درونداردىڭ قولداۋىمەن بارۋ قيىن ۋچاسكەلەر مەن تاۋ سوقپاقتارىن تەكسەرەدى.
سونداي-اق قۇتقارۋشىلار بەينەباقىلاۋ كامەرالارىنىڭ جازبالارىن قاراۋدى جالعاستىرىپ، ىزدەۋ اۋدانىندا بولعان تۋريستەردەن سۇراۋ الىپ جاتىر.
جۇمىستار كۇردەلى رەلەف، بيىكتىك جانە جەكەلەگەن ۋچاسكەلەردىڭ بارۋ قيىندىعىن ەسكەرە وتىرىپ، تاۋلىك بويى جۇرگىزىلۋدە.
بۇعان دەيىن «كۋرسيۆ» الماتى تاۋلارىنداعى ايۋساي شاتقالىندا اتا-اناسىمەن سەرۋەندەپ ءجۇرىپ اداسقان 2015 جىلى تۋعان بالانى ءبىر تاۋلىكتەن استام ىزدەۋدەن كەيىن تاپقانىن جازعان. ول سارقىرامادان جوعارى، شامامەن 2000 مەتر بيىكتىكتە تابىلىپ، وتباسىنا تاپسىرىلدى. ىزدەۋ جۇمىستارىنا 160-قا جۋىق ادام قاتىسقان.