17 تامىزدان باستاپ الماتى تۇرعىندارى ۇيىنەن 500 مەتر راديۋستاعى كوممۋنالدىق اقىلى تۇراققا تەگىن قويۋعا ءوتىنىم بەرە الادى، دەپ حابارلايدى infohub.kz سايتى.
الماتى قالالىق كولىك باسقارماسىنىڭ مالىمەتىنشە، تەگىن تۇراققا قويۋ قۇقىعى ءبىر تۇراق ورنى مەن ءبىر اۆتوكولىككە بەرىلەدى. ءبىراق تۇرعىندارعا ناقتى ورىن بەكىتىلمەيدى — ولار تەك بوس ورىن بولعان جاعدايدا عانا پايدالانا الادى.
ءوتىنىمدى «الماتى پاركينگ» سايتىندا نەمەسە eOtinish پلاتفورماسىندا ارنايى فورمانى تولتىرىپ قالدىرۋعا بولادى. بۇعان دەيىن Kolesa.kz باسىلىمى قالالىق تۇراقتار سايتىندا ءوتىنىم قالدىرۋ مۇمكىن بولماعانىن حابارلاعان ەدى. ءوتىنىم بەرۋ ءۇشىن ەكى ءارىپ پەن توعىز سيفردان تۇراتىن تىركەۋ كۋالىگىنىڭ ءنومىرىن كورسەتۋ قاجەت، دەگەنمەن قازاقستاندىق تەحپاسپورتتاردا تەك سەگىز سيفر كورسەتىلگەن. قازىرگى ۋاقىتتا قاتە تۇزەتىلدى.
تەگىن تۇراققا وتىنىمدەردى قاراۋ 15 كۇنگە دەيىن سوزىلادى. قاراۋ ناتيجەسىن ەكى اپتادان كەيىن بىلۋگە بولادى.
بۇعان دەيىن تۇراق قۇنى ءاربىر ناقتى وتكىزىلگەن مينۋت ءۇشىن ەسەپتەلەتىنى حابارلانعان بولاتىن. سونىمەن قاتار تەگىن ينتەرۆالدار ساقتالادى: الاڭدىق، جەراستى جانە كوپدەڭگەيلى تۇراقتاردان شىعۋ ءۇشىن 10 مينۋت، تروتۋارلىق تۇراقتاردا 5 مينۋت.