الماتىدا تۇرعىلىقتى جەرى جانە ۋاقىتشا تۇراتىن جەرى بويىنشا ازاماتتاردى تىركەۋدىڭ جاڭا ءنورماتيۆى ەنگىزىلدى: ەندى تىركەۋ كەزىندە تۇرعىن ءۇيدىڭ اۋدانى ەسكەرىلەدى — ءبىر ادامعا جالپى اۋدانى كەمىندە 15 شارشى مەتر، دەپ حابارلايدى infohub.kz سايتى.
NUR.KZ اگەنتتىگىنىڭ قالا اكىمدىگىنە سىلتەمە جاساپ حابارلاۋىنشا، جاڭا نورماتيۆ تۋرالى شەشىمدى ءماسليحات سەسسياسىندا جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ جاريالادى.
«جاڭا ءتارتىپ ءبىر مەكەنجايدا كوپ ادامنىڭ تىركەلۋ جاعدايلارىن شەكتەۋ جانە حالىقتىڭ ناقتى سانى تۋرالى دەرەكتەردى دالىرەك ەتۋ ءۇشىن ەنگىزىلىپ وتىر»، — دەدى اكىمدىكتە.
15 شارشى مەتر ءنورماتيۆى ءار ادامعا وسىنداي اۋدانداعى جەكە تۇرعىن ءۇي بەرىلۋى ءتيىس دەگەندى بىلدىرمەيتىنى ناقتىلاندى. بۇل — تەك تىركەۋ كەزىندە قولدانىلاتىن ەسەپتىك كورسەتكىش.
الايدا شەكتەۋ تۇرعىن ءۇي يەسىنىڭ وتباسى مۇشەلەرى مەن جاقىن تۋىستارىنا قولدانىلمايدى. بەلگىلەنگەن نورماتيۆتەن تىس جۇبايىن، بالالارىن جانە ولاردىڭ وتباسى مۇشەلەرىن، جاقىن تۋىستارىن، سونداي-اق اسىراۋىندا، قامقورلىعىندا نەمەسە قورعانشىلىعىنداعى ادامداردى تىركەۋگە بولادى.
«جاڭا نورماتيۆ تىركەۋ ەسەبىن رەتتەۋگە جانە ءار اۋداندا ناقتى قانشا ادام تۇراتىنىن دالىرەك بىلۋگە مۇمكىندىك بەرەدى. بۇل مەكتەپتەرگە، ەمحانالارعا، كوممۋنالدىق جانە وزگە دە قالالىق ينفراقۇرىلىمعا جۇكتەمەنى جوسپارلاۋ ءۇشىن ماڭىزدى»، — دەپ قوستى باۋىرجان جاۋباسوۆ.
الماتى ءماسليحاتى مۇنداي ءنورماتيۆتى بەلگىلەۋ قۇقىعىن «الماتى قالاسىنىڭ ەرەكشە مارتەبەسى تۋرالى» زاڭعا 2026 جىلعى 14 قىركۇيەكتە كۇشىنە ەنگەن وزگەرىستەردەن كەيىن الدى.