الماتىدا جىل باسىنان بەرى التى ۇشەم دۇنيەگە كەلدى. جۋىردا عانا قالانىڭ 27 جاستاعى تۇرعىنى ءۇش ۇلدىڭ اناسى اتاندى، دەپ حابارلايدى infohub.kz سايتى.
ۇلدار №2 قالالىق پەريناتالدىق ورتالىقتا دۇنيەگە كەلدى. ەندى وتباسىندا ءتورت ۇل بار — ۇلكەن بالاسى ءتورت جاستا.
جۇكتىلىك تريحوريالدى تريامنيوتيكالىق بولدى: ءار نارەستە ءوز پلاسەنتاسىمەن جانە قاعاناعىمەن بولەك دامىدى. بوسانۋ كەسار تىلىگى ارقىلى ءوتتى.
جاڭا تۋعان نارەستەلەر 1740-تان 1978 گراممعا دەيىنگى سالماقپەن جانە 34-تەن 37 سانتيمەترگە دەيىنگى بويمەن دۇنيەگە كەلدى. اتا-اناسى ولارعا ومار، ميراس جانە مۋسليم دەگەن ەسىمدەر قويدى.
قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، تۋعاننان كەيىن نارەستەلەردىڭ بىرەۋى العاشقى كۇندەرى نەعۇرلىم قارقىندى رەسپيراتورلىق قولداۋدى قاجەت ەتىپ، ەكى كۇن جاساندى وكپە جەلدەتۋ اپپاراتىندا بولدى. ءقازىر ۇشەۋى دە سيپاپ-تەراپيا الىپ جاتىر، ولاردىڭ جاعدايى ديناميكادا باعالانۋدا. دارىگەرلەر جاقسارۋ بايقاپ وتىر.
اناسى ۇلدارى دۇنيەگە كەلگەننەن كەيىنگى العاشقى مينۋتتار ءوزى ءۇشىن ەرەكشە تولقىنىستى بولعانىن ايتتى.
«نارەستەلەرىمدى العاش كورگەنىمدە، ولار سونداي كىشكەنتاي ءارى ءالسىز كورىنگەندىكتەن، قاتتى تولقىپ، جىلادىم. ءبىراق ورتالىق قىزمەتكەرلەرى مەنى قاتتى قولدادى، سونىڭ ىشىندە پسيحولوگيالىق جاعىنان دا كومەكتەستى. دارىگەرلەرگە جانە بارلىق قىزمەتكەرلەرگە قامقورلىقتارى، كوڭىل بولگەندەرى جانە قولداۋلارى ءۇشىن شىن جۇرەكتەن العىس ايتقىم كەلەدى»، — دەدى ول.
نارەستەلەر №2 قالالىق پەريناتالدىق ورتالىق ماماندارىنىڭ تۇراقتى باقىلاۋىندا قالادى.
باسقارما حابارلاعانداي، 2026 جىلدىڭ باسىنان بەرى الماتىدا 603 قوسارجۇلدىز جانە التى ۇشەم دۇنيەگە كەلدى.