16 تامىزدان باستاپ الماتىدا كولىك تۇراعىنىڭ جاڭارتىلعان ەرەجەلەرى كۇشىنە ەندى. ەندى قالا تۇرعىندارى ۇيىنەن 500 مەتر راديۋستا ءوز كولىگىنە تەگىن ورىن الا الادى، دەپ حابارلايدى infohub.kz.
الماتى قالالىق ءماسليحاتىنىڭ شەشىمىنە سايكەس، كوممۋنالدىق اقىلى تۇراقتاردى پايدالانۋ ەندى بەلگىلەنگەن ۋاقىتقا ەمەس، مينۋت سايىن تولەنەدى. بۇل وزگەرىس قالاداعى بارلىق كوممۋنالدىق تۇراقتارعا قاتىستى.
تروتۋارلىق تيپتەگى تۇراقتاردا العاشقى بەس مينۋت تەگىن. بۇل ۋاقىت جولاۋشىلاردى وتىرعىزۋ نەمەسە ءتۇسىرۋ، سونداي-اق كولىكتى تيەۋ نەمەسە ءتۇسىرۋ ءۇشىن بەرىلەدى. ەگەر كولىك ۇزاعىراق تۇرسا، تولەم جەڭىلدىك مەرزىمى اياقتالعان ساتتەن باستاپ ەسەپتەلەدى، ءبىراق العاشقى بەس مينۋت توقتاۋ ەسكەرىلەدى.
سونىمەن قاتار، جەرگىلىكتى تۇرعىندارعا تەگىن تۇراققا تۇرۋ مۇمكىندىگى پايدا بولدى. كوپپاتەرلى ۇيلەردە تۇراتىن مەنشىك يەلەرى مەن جالعا الۋشىلار ءوز پاتەرىنەن 500 مەتر راديۋستا تاڭداعان ءبىر كوممۋنالدىق تۇراقتى تەگىن پايدالانا الادى.
قۇجاتتا: «تەگىن پايدالانۋدى ۇسىنۋ باسقارۋشى ۇيىمنىڭ ينتەرنەت-رەسۋرسى نەمەسە ازاماتتاردىڭ بارلىق وتىنىشتەرىن قابىلداۋ مەن وڭدەۋدىڭ ءبىرىڭعاي پلاتفورماسى ارقىلى بەرىلگەن ءوتىنىش نەگىزىندە جۇزەگە اسىرىلادى»، — دەپ كورسەتىلگەن.
ماڭىزدىسى، تەگىن تۇراق ءبىر پاتەرگە ءبىر كولىككە بەرىلەدى. الايدا بۇل جەڭىلدىك جەراستى، ايىرباستاۋ، كوپدەڭگەيلى جانە مەحانيكالاندىرىلعان تۇراقتارعا قولدانىلمايدى.
سونداي-اق، تۇراقتاردا ءنومىرىن انىقتاۋ قيىن نەمەسە ونى جاسىرۋعا نەمەسە وزگەرتۋگە بولاتىنداي ەتىپ ورناتىلعان كولىكتەردى قالدىرۋعا تىيىم سالىنادى.
مەگاپوليس تۇرعىندارى تۇراق اقىسىن كەيىن تولەي الادى. تولەمدى كولىك تۇراققا قويىلعان كۇنى ساعات 23:59-عا دەيىن جاساۋعا بولادى. تروتۋارلىق تيپتەگى كوممۋنالدىق تۇراقتاردىڭ ءوزى ەندى 8:00-دەن 20:00-گە دەيىن جۇمىس ىستەيدى.