دەنساۋلىق ساقتاۋ مينيسترلىگىنىڭ باسشىسى قازاقستاننىڭ وڭىرلەرىندە بالالارعا ستوماتولوگيالىق كومەكتىڭ ناقتى قولجەتىمدىلىگىن كۇشەيتۋدى تاپسىردى، دەپ حابارلايدى infohub.kz.
دەنساۋلىق ساقتاۋ مينيسترلىگىنىڭ Telegram-ارناسىندا اقمارال النازاروۆا ءوڭىر باسشىلارىنا ستوماتولوگيالىق كومەك كورسەتۋدە مەكتەپ جاسىنا دەيىنگى بالالارعا ەرەكشە نازار اۋدارۋدى جانە ەمدەۋگە تالون الۋداعى كەزەكتەردى جويۋدى تاپسىرعانى ايتىلدى.
«ءبىز ءۇشىن ەڭ باستىسى – ەسەپتىلىك ەمەس، قاعازداعى ساندار ەمەس. ءار كورسەتكىشتىڭ ارتىندا ناقتى بالا مەن ناقتى وتباسى تۇر. ەگەر اتا-انالار بالاسىنا ستوماتولوگيالىق كومەك الۋ ءۇشىن تاڭعى ساعات بەستە كەلىپ، كەزەكتە تۇرۋعا ءماجبۇر بولسا، بۇل جۇيەنىڭ جەتكىلىكتى جاقسى جۇمىس ىستەمەيتىنىن بىلدىرەدى. ءبىز مۇنى تۇزەتۋىمىز كەرەك»، – دەدى ۆەدومستۆو باسشىسى.
مينيستر مەملەكەتتىك باعدارلامالار اياسىندا بالالارعا ستوماتولوگيالىق كومەك مەملەكەت تاراپىنان قارجىلاندىرىلاتىنىن اتاپ ءوتتى. وسىعان بايلانىستى، ونىڭ ايتۋىنشا، نەگىزگى نازار بار رەسۋرستاردى ءتيىمدى ۇيىمداستىرۋ مەن ۇيلەستىرۋگە اۋدارىلۋى كەرەك.
«ءبىز بۇل ماسەلەنى اتا-انالاردىڭ موينىنا جۇكتەمەۋىمىز كەرەك نەمەسە ءار جولى قوسىمشا بيۋدجەت قاراجاتىن ىزدەمەۋىمىز كەرەك. ەڭ الدىمەن، بار رەسۋرستاردىڭ جۇمىسىن دۇرىس ۇيىمداستىرۋ قاجەت. بالا اتا-اناسى تالون الا الماعانى نەمەسە بىرنەشە ساعات كەزەكتە تۇرعانى ءۇشىن كومەكسىز قالماۋى كەرەك. ءبىزدىڭ مىندەتىمىز – قاجەتتى كومەكتىڭ ۋاقتىلى جانە وتباسىنىڭ تۇرعىلىقتى جەرىنە جاقىن جەردە قولجەتىمدى بولۋىن قامتاماسىز ەتۋ»، – دەدى اقمارال النازاروۆا.
مينيستر وبلىس اكىمدەرىنىڭ ورىنباسارلارى مەن ءتيىستى باسقارمالارعا دەنساۋلىق ساقتاۋ، ءبىلىم بەرۋ باسقارمالارى، مەديسينالىق ۇيىمدار جانە الەۋمەتتىك مەديسينالىق ساقتاندىرۋ قورى اراسىنداعى ۇيلەستىرۋدى كۇشەيتۋدى تاپسىردى.
«ءبىز اتا-انالاردىڭ الەۋمەتتىك جەلىلەرگە جۇگىنۋىن نەمەسە شاعىم جازۋىن كۇتپەۋىمىز كەرەك. جەرگىلىكتى باسشىلار مۇنداي ماسەلەلەردى ەرتەرەك كورىپ، ادام مەديسينالىق كومەك الۋدا كەدەرگىگە تاپ بولعانعا دەيىن شەشۋى ءتيىس»، – دەپ قوستى مينيستر.
دەنساۋلىق ساقتاۋ مينيسترلىگى ەلدىڭ بارلىق وڭىرلەرىندە بالالارعا مەديسينالىق قىزمەتتەردىڭ ناقتى قولجەتىمدىلىگىن باعالاي وتىرىپ، جاعدايدى باقىلاۋدى جالعاستىراتىنىن جەتكىزدى.