قىتايلىق ەلەكتروكولىكتەردى ساتىپ الىپ، قايتا ساتۋمەن اينالىسقان قازاقستاندىق كاسىپكەرلەر اۆتوسالون يەسىنىڭ الداۋىنان 700 ملن تەڭگە جوعالتقاندارىن مالىمدەدى، دەپ حابارلايدى infohub.kz سايتى.
الماتىداعى جۇڭگو كولىكتەرىن قايتا ساتۋمەن اينالىساتىن 40 كاسىپكەر اۆتوسالون يەسىنىڭ الاياقتىعىنىڭ قۇربانى بولعاندارىن ايتادى. ولاردىڭ سوزىنشە، ولارعا كولىكتەردى ساتىپ، تۇسكەن پايدانى ءبولىسۋدى ۋادە ەتكەن.
«ماعان قوڭىراۋ شالىپ، Changan CS55 Plus كەرەك ەكەنىن، شىمكەنتتە كليەنتتەر بارىن ايتتى: "اقشانى 3-4 كۇندە قايتارامىز، كليەنتتەر دايىن تۇر". جارايدى، كەلىستىك. ەكى كولىكتى اكەلدىك. ولار ساتىلدى. بۇل 12 ماۋسىمدا بولدى. ءقازىر تامىز، ەكى اي ءوتتى. ءالى كۇنگە دەيىن اقشا جوق»، — دەدى كاسىپكەر نۇرجان بوشتاي.
ودان كەيىن، ساتۋشىنىڭ ايتۋىنشا، ونىڭ كولىكتەرى قايتا ساتىلا بەرگەن. وسى ۋاقىت ىشىندە كولىكتىڭ ءۇش يەسى اۋىسقان، ءقازىر كولىك كەپىلدە تۇر. ءدال وسىنداي ماسەلەمەن كەمىندە 40 ساتۋشى كەزىككەن، ولاردىڭ بارلىعى ءبىر اۆتوسالونمەن جۇمىس ىستەگەن.
«ءبىز اۆتوسالون يەسىنىڭ بۇرىن دا الاياق بولعانىن بىلدىك. ەگەر ول ءوزى حابارلاسقاندا، ءبىز وعان اقشا مەن كولىك بەرمەس ەدىك. سوندىقتان ول ءوز ورنىنا اگەنتتەرىن جىبەرگەن. ءبىزدىڭ بىلۋىمىزشە، ونىڭ ءۇش اۆتوسالونى بولعان. ول ادامداردى ءبىر جىلدان استام ۋاقىت بويى الداپ ءجۇر دەپ ويلايمىن»، — دەدى كاسىپكەر ءادىل بەكجان.
ساتۋشىلاردىڭ ايتۋىنشا، اۆتوسالون اۋماعى ەكى اپتا بۇرىن مورلەنگەن. وعان دەيىن ءبىر اي بويى مۇندا ساتىلىمعا قويىلعان جۇڭگو كولىكتەرى تۇرعان. ءقازىر قاقپالار جابىق، اۋماقتا كولىك جوق.
كاسىپكەرلەر پوليسياعا ارىزدانعان، سول كۇنى اۆتوسالون يەسى ۇستالعان. «كۇدىكتى ۇستالىپ، ۋاقىتشا ۇستاۋ يزولياتورىنا قامالدى. اسا ءىرى كولەمدە جاسالعان الاياقتىق فاكتىسى بويىنشا قىلمىستىق ءىس قوزعالدى. قازىرگى ۋاقىتتا قىلمىسقا قاتىسى بار باسقا ادامداردىڭ شەڭبەرى انىقتالۋدا»، — دەدى الماتى قالالىق پد رەسمي وكىلى سالتانات ازىربەك.
ايتا كەتەيىك، اۆتوسالون يەسىنە جەتى جىلعا دەيىن باس بوستاندىعىنان ايىرۋ جازاسى ءقاۋىپ ءتونىپ تۇر.