تاريحي مۇرا، ءتىرى تابيعات، قازاق ءداستۇرى، مۋزىكا مەن سپورت «التىن-ەمەل – قۇلاندار مەكەنى» اتتى تۇڭعىش ەتنو-تاريحي فەستيۆالىندە توعىسادى. ءىس-شارا 17 قازاندا «التىن-ەمەل» ۇلتتىق پاركىندەگى Altynemel ۆيزيت-ورتالىعىندا وتەدى. ول شەڭگەلدى اۋىلىنان 36 شاقىرىم جەردە، قاپشاعايدىڭ سولتۇستىك جاعاسىندا ورنالاسقان، دەپ حابارلايدى infohub.kz سايتى.
مەرەكەنىڭ باستى يدەياسى — دالا تابيعاتى مەن كوشپەلىلەر مادەنيەتىنىڭ بىرلىگى. باعدارلاما ساعات 12:00-دە قۇلانداردى تابيعي ورتاسىندا باقىلاۋدان باستالادى. سودان كەيىن كورەرمەندەرگە كوشپەلىلەردىڭ جاۋىنگەرلىك داستۇرىنە ارنالعان شوۋ ۇسىنىلادى: باتىرلاردىڭ «قىلىش اينالدىرۋ» جانە «ايبالتا شوۋ» اتتى جالىندى ونەر كورسەتۋلەرى.
13:30-دا شولاق تاۋلارىنداعى پەتروگليفتەرگە ەكسكۋرسيا باستالادى. اڭ اۋلاۋ كورىنىستەرى، جابايى جانۋارلاردىڭ بەينەلەرى، اربا تاڭبالارى جانە باسقا دا سۋرەتتەر مىڭجىلدىقتار ارقىلى اتا-بابالارىمىزدىڭ الەمىن جەتكىزدى. سونداي-اق پەتروگليفتەر، جەتىسۋ تاريحى مەن تابيعاتى تۋرالى دارىستەر جوسپارلانعان.
فەستيۆالدىڭ مۋزىكالىق بولىگىندە ەتنيكالىق مۋزىكانىڭ ناعىز جۇلدىزدارى ونەر كورسەتەدى: Arkaiym توبى، قوبىزشى ءلايلا تاجىباەۆا جانە شان-قوبىز شەبەرلەرى.
جاس قوناقتاردى ويىندار مەن كۆەستتەر، ەرەسەكتەردى پەتروگليف سالۋ، تۇركى رۋنالارى، ەكسپەديسيادا امان قالۋ داعدىلارى، حەند-مەيد جانە اسپازدىق شەبەرلىك ساباقتارى كۇتەدى. بارلىعىن «قولونەر جارمەڭكەسى» بىرىكتىرەدى.
سپورت اۋەسقويلارى ءۇشىن ەرەكشە باعدارلاما دايىندالعان: فەستيۆال كۇنى تاڭەرتەڭ شولاق تاۋلارىنىڭ كوركەم تابيعاتىندا 10 جانە 5 شاقىرىمدىق جۇگىرۋ جارىسى وتەدى. ول تانىمال الماتىلىق سۋرەتشى سانجار جۇبانوۆ قاشاپ سالعان جارتاس سۋرەتتەرىنە قاراي جۇرەدى.
كۇنى: 17 قازان 2026 جىل. كىرۋ تەگىن. جۇگىرۋ جارىسى 9:30-دا، فەستيۆال 12:00-دە باستالادى. وتەتىن ورنى: Altynemel ۆيزيت-ورتالىعى، قاپشاعايدىڭ سولتۇستىك جاعاسى (فەستيۆال كۇنى ۆيزيت-ورتالىق جۇمىس ىستەيدى).
جۇگىرۋ جارىسىنا تىركەلۋ جانە سپورتشىلارعا ترانسفەر سىلتەمە ارقىلى قولجەتىمدى. قوناقتارعا ترانسفەر +7 707 976 7070 (WhatsApp) ءنومىرى بويىنشا الدىن الا تىركەلۋ ارقىلى بەرىلەدى، سول جەردەن انىقتاما دا الۋعا بولادى. قوسىمشا اقپارات فەستيۆالدىڭ Instagram-اككاۋنتىندا.
ۇيىمداستىرۋشىلار: Qazaq National Parks ج ش س، «وحوتنيكي زا پەتروگليفامي» قق، «التىن ەمەل» مەملەكەتتىك ۇلتتىق تابيعي پاركى، Central Asian Sustainable Tourism Development Foundation، DDA كرەاتيۆتى اگەنتتىگى، جەتىسۋ وبلىسى اكىمدىگىنىڭ جانە «وستروۆ كرىم» زەرتحاناسىنىڭ قولداۋىمەن.