«قازمىرىش» قۇرامىنا كىرەتىن «التىنتاۋ كوكشەتاۋ» التىن ءوندىرۋشى كومپانياسى اقمولا وبلىسىنىڭ زەرەندى اۋدانىنداعى كەن ورنىن جەر استى ادىسىمەن يگەرۋگە كىرىستى. نىساندا العاشقى جەر استى جارىلىسى جاسالىپ، بولاشاق كەنىشتىڭ پورتالىن وتۋگە باستاما بەردى. بۇل كەن ورنىنىڭ قىزمەت ەتۋ مەرزىمىن 2047 جىلعا دەيىن ۇزارتۋعا مۇمكىندىك بەرەدى، دەپ حابارلايدى infohub.kz سايتى.
ءوندىرىستى كەڭەيتۋ ءۇشىن جەرگىلىكتى اتقارۋشى ورگاندار كاسىپورىنعا 1057 گەكتار قوسىمشا ۋچاسكە ءبولدى. العاشقى جۇمىستار بيىلعى جىلدىڭ قاڭتارىندا باستالعان ەدى، سول كەزدە تاۋ-كەنشىلەر تاۋ جىنىسىنىڭ العاشقى ءشومىشىن كوتەرگەن بولاتىن. كومپانيا التىن قۇرامدى كەندى ءوندىرىپ، ونى №1185 جەر قويناۋىن پايدالانۋ شارتى اياسىندا مەنشىكتى فابريكاسىندا التىن كونسەنتراتىنا وڭدەيدى.
«جوبانىڭ ىسكە اسۋى اقمولا وبلىسىنىڭ دامۋىنا ەلەۋلى ۇلەس قوسادى، جاڭا جۇمىس ورىندارىن اشادى جانە كاسىپورىننىڭ ودان ءارى دامۋىنا جاڭا سەرپىن بەرەدى»، – دەپ اتاپ ءوتتى اقمولا وبلىسى اكىمىنىڭ ورىنباسارى ەرنار جاركەشوۆ.
بۇگىندە «التىنتاۋ كوكشەتاۋ» ءوڭىردىڭ ونەركاسىپ ءوندىرىسىنىڭ 17%-ىن جانە وڭدەۋ ونەركاسىبىنىڭ 23%-ىن قامتاماسىز ەتەدى. كاسىپورىندا 1700-دەن استام ادام ەڭبەك ەتەدى.
«بولاشاق جەر استى كەنىشىنىڭ پورتالىن ءوتۋ كەزىندەگى العاشقى جارىلىس – كومپانيا تاريحىنداعى ماڭىزدى قادام. بۇل وقيعانىڭ ارتىندا ۇجىمنىڭ ۇلكەن ەڭبەگى جانە ءبىز دايەكتى تۇردە ءجۇرىپ وتكەن جاڭا كەزەڭ تۇر»، – دەپ اتاپ ءوتتى «التىنتاۋ كوكشەتاۋ» باس ديرەكتورى ارمان الييەۆ.
2025 جىلعى قارجىلىق ەسەپتىلىككە سايكەس، كومپانيانىڭ تازا پايداسى 77،5%-عا – 211،6 ملرد تەڭگەدەن 375،6 ملرد تەڭگەگە دەيىن ءوستى.
سوڭعى ايلاردا نارىقتا شۆەيساريالىق ترەيدەر Glencore International AG كومپانياسىنىڭ «قازمىرىشتاعى» ۇلەسىن ساتۋى مۇمكىن دەگەن ماسەلە بەلسەندى تالقىلانۋدا. مامىلە قۇنى $3،5 ملرد بولىپ باعالانۋدا. 2025 جىلعى 31 جەلتوقسانداعى جاعداي بويىنشا Glencore «قازمىرىش» باس كومپانياسى اكسيالارىنىڭ 69،74%-ىنا يە، مەملەكەتتىك «تاۋ-كەن سامۇرىق» – 29،82%-ىنا، قالعان اكسيونەرلەر – 0،44%-ىنا يە.