كوكشەتاۋدا پوليسيا شەتەلگە جۇمىسقا ورنالاستىرۋعا بايلانىستى الاياقتىق فاكتىسى بويىنشا قىلمىستىق ءىستى تەرگەپ جاتىر. وسى ءىس بويىنشا 93 ادام شامامەن 60 ميلليون تەڭگە شىعىنعا ۇشىراعان، دەپ حابارلايدى infohub.kz سايتى.
اقمولا وبلىسى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، كوكشەتاۋ قالالىق پوليسيا باسقارماسىنىڭ قىزمەتكەرلەرى شەتەلدە جۇمىسقا ورنالاستىرۋ قىزمەتىن كورسەتۋگە بايلانىستى الاياقتىق فاكتىسى (قازاقستان رەسپۋبليكاسى قىلمىستىق كودەكسىنىڭ 190-بابىنىڭ 4-بولىگى) بويىنشا سوتقا دەيىنگى تەرگەۋ جۇرگىزۋدە.
تەرگەۋ دەرەكتەرى بويىنشا، كۇدىكتى 2023 جىلدان 2026 جىلدىڭ قاڭتارىنا دەيىنگى كەزەڭدە الەۋمەتتىك جەلىلەر ارقىلى ازاماتتارعا ۇلىبريتانياعا جۇمىسقا ورنالاسۋ قىزمەتىن ۇسىنعان. ول ۆيزا راسىمدەۋ، مەديسينالىق ساقتاندىرۋ، بيومەتريالىق دەرەكتەردى تاپسىرۋ جانە باسقا دا قاجەتتى قۇجاتتاردى دايىنداۋ سىلتاۋىمەن ازاماتتاردان اقشا قاراجاتىن العان، الايدا ۋادە ەتكەن مىندەتتەمەلەرىن ورىنداماعان.
قازىرگى ۋاقىتتا قىلمىستىق ءىس بويىنشا 93 ادام زارداپ شەككەن دەپ تانىلعان. الدىن الا دەرەكتەر بويىنشا، كەلتىرىلگەن زالالدىڭ جالپى سوماسى شامامەن 60 ميلليون تەڭگەنى قۇرايدى. اقشا قاراجاتى قولما-قول دا، بانكتىك اۋدارىمدار ارقىلى دا بەرىلگەن، دەپ ءتۇسىندىردى پوليسيا دەپارتامەنتىندە.
تەرگەۋ بارىسىندا قاجەتتى تەرگەۋ ارەكەتتەرى جۇرگىزىلىپ، كۇدىكتى جاۋاپقا تارتىلدى. وعان قاتىستى ءۇيقاماق تۇرىندەگى بۇلتارتپاۋ شاراسى تاڭدالدى. تەرگەۋ جالعاسۋدا، پوليسەيلەر وقيعانىڭ بارلىق ءمان-جايىن جانە باسقا دا ىقتيمال زارداپ شەككەندەردى انىقتاۋدا.