تۇركىستان وبلىسىنىڭ وتىرار اۋدانىندا جەتى كۇن بۇرىن جوعالعان انا مەن ءتورت بالاسى امان-ەسەن تابىلدى، دەپ حابارلايدى infohub.kz.
پوليسيا مالىمەتىنشە، جەرگىلىكتى تۇرعىن قۇقىق قورعاۋ ورگاندارىنا ايەلى مەن ءتورت بالاسىنىڭ ۇيدەن شىعىپ كەتىپ، قايتىپ ورالماعانى تۋرالى ارىزدانعان. وسىدان كەيىن پوليسيا قىزمەتكەرلەرى جەدەل-ىزدەستىرۋ شارالارىن باستاپ، اۋدانعا كىرەتىن جانە شىعاتىن جولداردا باقىلاۋ-وتكىزۋ پۋنكتتەرىن قۇرىپ، كورشىلەس ايماقتارعا باعدارلاما جولدادى.
ىزدەستىرۋ بارىسىندا 6، 5 جانە 3 جاستاعى ءۇش بالاسىمەن جانە 10 ايلىق سابيىمەن بىرگە كەتكەن ايەل تاكسيدەن تابىلىپ، پوليسيا بولىمىنە جەتكىزىلدى.
تەكسەرۋ بارىسىندا ايەلدىڭ كۇيەۋىمەن تۇرمىستىق جانجالدان كەيىن بالالارى مەن قۇجاتتارىن الىپ، ەشكىمگە ايتپاستان شىمكەنتكە كەتكەنى جانە سول جاقتا جالدامالى پاتەردە تۇرعانى انىقتالدى.
پوليسيانىڭ حابارلاۋىنشا، وتباسى مۇشەلەرىمەن پروفيلاكتيكالىق اڭگىمە جۇرگىزىلىپ، تۋىستارىنىڭ قاتىسۋىمەن تاراپتار تاتۋلاسقان. اناسى بالالارىمەن بىرگە ۇيىنە امان-ەسەن ورالدى.