الماتىلىق 18 جاستاعى اننا چەركاشينا جەڭىل اتلەتيكادان جاستار اراسىنداعى الەم چەمپيوناتىنىڭ فينالىنا جولداما الدى. اقش-تىڭ يۋدجين قالاسىندا ءوتىپ جاتقان جارىستىڭ ىرىكتەۋ كەزەڭىندە ول 4،10 مەتر بيىكتىكتى ەڭسەرىپ، جەكە رەكوردىن جاڭارتتى. بۇل ناتيجە قازاقستاننىڭ دا رەكوردى بولىپ تابىلادى. وسى كورسەتكىشپەن ول 8 تامىزدا مەدال ءۇشىن كۇرەسەتىن 13 ءفيناليستتىڭ قاتارىنا ەندى. بارلىق فيناليستتەر بىردەي ناتيجە كورسەتكەندىكتەن، فينال شيەلەنىستى بولادى دەپ كۇتىلۋدە، دەپ حابارلايدى infohub.kz.
بۇل چەمپيوناتتا قازاقستان قۇراماسىن التى جىگىت پەن بەس قىز نامىسىن قورعاپ جاتىر. ولاردىڭ بارلىعى قاجەتتى نورماتيۆتەردى ورىنداعان. بۇل — 2008 جىلدان بەرى ەڭ كوپ قۇرام. سوندا پولشانىڭ بىدگوشش قالاسىندا وتكەن جاستار اراسىنداعى الەم چەمپيوناتىندا 12 سپورتشى قاتىسقان ەدى. سالىستىرۋ ءۇشىن، ەكى جىل بۇرىن پەرۋ استاناسى ليمادا نەبارى بەس وكىل بولسا، 2022 جىلى كولۋمبيانىڭ كالي قالاسىندا تورتەۋى عانا ب ا ق سىناعان.
قازاقستان رەسپۋبليكاسى جەڭىل اتلەتيكا فەدەراسياسىنىڭ ءباسپاسوز قىزمەتىنىڭ مالىمەتىنشە، 1994 جىلى ليسسابوندا وتكەن جاستار اراسىنداعى الەم چەمپيوناتىنا العاش قاتىسقاننان بەرى قازاقستاندىق سپورتشىلار بىردە-بىر ءتۋرنيردى جىبەرىپ الماعان. سول جىلى پورتۋگاليا استاناسىندا ەل نامىسىن اندرەي تارانەنكو، اندرەي سكليارەنكو، ۆيكتوريا توكونباەۆا، ناتاليا دوروحينا جانە سۆەتلانا بادرانكوۆا قورعاعان. وسى جارىستارعا قاتىسۋ تاريحىندا قازاقستاندىق جەڭىل اتلەتتەر ءالى كۇنگە دەيىن جۇلدەلى ورىنعا كوتەرىلە الماي كەلەدى.