Anthropic كومپانياسى ازىرلەگەن Claude جاساندى ينتەللەكت مودەلى گەنەتيكالىق دەرەكتەردى اۆتونومدى تالداۋ بارىسىندا باكتەريوفاگتاردىڭ — باكتەريالاردى زاقىمدايتىن ۆيرۋستاردىڭ — دنق-سىندا بۇرىن بەلگىسىز فەرمەنتتىك جۇيەنى انىقتادى. بۇل تۋرالى infohub.kz سايتى حابارلايدى.
جاڭا جۇيە ماسسيۆتەرمەن بايلانىسقان كەرى ترانسكريپتازالار نەمەسە ART (array-associated reverse transcriptases) دەپ اتالدى. ونىڭ باستى ەرەكشەلىگى — فەرمەنت گەنىنىڭ جانىندا قايتالاناتىن دنق فراگمەنتتەرىنىڭ بولۋى، بۇل قۇرىلىمى جاعىنان اتاقتى CRISPR گەنومىن وڭدەۋ تەحنولوگياسىنا ۇقسايدى.
تاجىريبەگە شامامەن 950 جي-اگەنت قاتىسىپ، ولار 21،5 ساعات بويى ادامنىڭ تىكەلەي ارالاسۋىنسىز 1،9 ميلليارد اقۋىز كلاستەرىنەن تۇراتىن دەرەكقوردا اۆتونومدى ىزدەۋ جۇرگىزدى. سودان كەيىن كومپانيا عالىمدارى زەرتحانالىق سىناقتار وتكىزىپ، تابىلعان قۇرىلىمنىڭ بار ەكەنىن راستادى.
اشىلىمنىڭ بىرەگەيلىگىنە قاراماستان، ساراپشىلار مەن ازىرلەۋشىلەردىڭ وزدەرى ART جۇيەسىنىڭ ناقتى فۋنكسيالارى ءالى انىقتالماعانىن اتاپ وتەدى. قازىرگى تاڭدا ونىڭ CRISPR سياقتى گەندەردى ماقساتتى وڭدەۋگە قولدانىلۋى مۇمكىن بە، بەلگىسىز.
ماسساچۋسەتس تەحنولوگيالىق ينستيتۋتى مەن گارۆارد ۋنيۆەرسيتەتى جانىنداعى برود ينستيتۋتىنىڭ مولەكۋلالىق بيولوگى فەن چجان مۇنداي قۇرىلىمداردىڭ تابىلۋى عىلىم ءۇشىن ۇلكەن قىزىعۋشىلىق تۋدىراتىنىن جانە جي-اگەنتتەردىڭ بيولوگيالىق زەرتتەۋلەردەگى جوعارى الەۋەتىن كورسەتەتىنىن اتاپ ءوتتى.