قازاقستاندىقتارعا ارال تەڭىزىندەگى سۋ دەڭگەيى تۋرالى ءۇمىت كۇتتىرەر جاڭالىق ايتىلدى. سولتۇستىك ارال تەڭىزىندەگى سۋ كولەمى 23،4 ملرد تەكشە مەترگە دەيىن ارتتى، دەپ حابارلايدى infohub.kz سايتى.
ق ر سۋ رەسۋرستارى جانە يرريگاسيا مينيسترلىگىنىڭ مالىمەتىنشە، وتكەن جىلدىڭ قازان ايىنان باستاپ سولتۇستىك ارال تەڭىزىنە 1،2 ملرد تەكشە مەتر سۋ جىبەرىلگەن. سوڭعى جىلدارى قابىلدانعان شارالار تەڭىزگە سۋدىڭ تۇراقتى اعىنىن قامتاماسىز ەتۋگە مۇمكىندىك بەردى.
2025 جىلدىڭ 1 قازانىنان بۇگىنگە دەيىن سىرداريا وزەنى ارقىلى سولتۇستىك ارالعا شامامەن 1،2 ملرد تەكشە مەتر سۋ باعىتتالدى. اعىمداعى ۆەگەتاسيالىق كەزەڭدە تەڭىزگە سەكۋندىنا 14 تەكشە مەتر سۋ تۇسۋدە. ۆەگەتاسيالىق كەزەڭنىڭ سوڭىنا دەيىن سۋ بەرۋدى بىرتىندەپ سەكۋندىنا 100-150 تەكشە مەترگە دەيىن ارتتىرۋ جوسپارلانۋدا.
قازىرگى ۋاقىتتا سولتۇستىك ارالداعى سۋ كولەمى 23،4 ملرد تەكشە مەتردى قۇرايدى.
«سولتۇستىك ارالدى ساقتاۋ ماقساتىندا ءبىرقاتار جوبا جۇزەگە اسىرىلۋدا، ونىڭ ىشىندە سىرداريا وزەنى الابىندا سۋ ەسەبىن اۆتوماتتاندىرۋ جانە گيدروتەحنيكالىق قۇرىلىستاردى قايتا جاڭارتۋ بار. سونداي-اق كورشىلەس مەملەكەتتەرمەن ءوزارا ءىس-قيمىل نىعايتىلۋدا. مىسالى، وزبەكستان رەسپۋبليكاسىمەن ترانسشەكارالىق سۋ وبەكتىلەرىن بىرلەسىپ باسقارۋ جانە ۇتىمدى پايدالانۋ تۋرالى كەلىسىمگە قول قويىلدى، بۇل ون جىلدىق كەلىسسوزدەردىڭ ناتيجەسى بولىپ تابىلادى»، — دەدى سۋ رەسۋرستارى جانە يرريگاسيا ءبىرىنشى ۆيسە-مينيسترى نۇرلان الدامجاروۆ.
ەسكە سالا كەتەيىك، بىرنەشە جىل بۇرىن قازاقستان كورشىلەس ەلدەرمەن ارال تەڭىزىن تولىقتىرۋ تۋرالى كەلىسكەن بولاتىن. كەيىن ەكولوگيا مينيسترلىگى ارال تەڭىزىنىڭ تۇبىندە سەكسەۋىل ورمانى پايدا بولاتىنىن حابارلاعان ەدى.
2026 جىلدىڭ ساۋىرىندە قاسىم-جومارت توقايەۆ وڭىرلىك ەكولوگيالىق سامميتتە سويلەگەن سوزىندە ارال تەڭىزىنىڭ جاي-كۇيى تۋرالى مالىمدەمە جاسادى.