قازاقستاننىڭ كوپتەگەن قالالارىندا پاتەر جالداۋ باعاسى ءوسىپ كەلەدى. تەك تامىزدىڭ العاشقى ەكى اپتاسىندا – 1 مەن 18 تامىز ارالىعىندا – جالدامالى تۇرعىن ءۇيدىڭ مەدياندىق باعاسى شامامەن 3،8%-عا ءوستى، دەپ حابارلايدى infohub.kz سايتى.
ەڭ كوپ ەكى جانە ءۇش بولمەلى پاتەرلەر قىمباتتادى. ەل بويىنشا ورتا ەسەپپەن «ەكى بولمەلى» پاتەرلەردى جالداۋ 4،3%-عا، «ءۇش بولمەلى» – 4،2%-عا ءوستى. ءبىر بولمەلى پاتەرلەر 2،5%-عا قىمباتتادى.
ءوسىم شىلدەنىڭ اياعىندا باستالعان ەدى، سول كەزدە قازاقستان بويىنشا جالداۋ باعاسى ءبىر اي ىشىندە 3%-دان استامعا وسكەن. ودان ءارى قىمباتتاۋدىڭ ءبىر سەبەبى – ماۋسىمدىق فاكتور: وقۋ جىلى باستالار الدىندا ستۋدەنتتەر جالدامالى تۇرعىن ءۇي نارىعىنا بەلسەندى شىعادى.
ءوسۋ قارقىنى بويىنشا اقتاۋ كوش باستادى – مۇندا جالداۋ باعاسى ورتا ەسەپپەن 9،5%-عا ءوستى. ەكىنشى ورىندا الماتى – 8،6% ءوسىم. سەمەيدە پاتەرلەر ورتا ەسەپپەن 7،7%-عا، پاۆلوداردا – 7،4%-عا، پەتروپاۆل مەن تۇركىستاندا – 5،6%-عا قىمباتتادى. ودان كەيىن قاراعاندى (+5،3%)، اقتوبە (+4%)، استانا (+3،9%) جانە شىمكەنت (+3،8%) تۇر.
اسىرەسە الماتىداعى كەڭ پاتەرلەردىڭ باعاسى ايتارلىقتاي ءوستى. ەكى بولمەلى تۇرعىن ءۇيدى جالداۋ نەبارى ەكى اپتا ىشىندە ايىنا 300 مىڭ تەڭگەدەن 340 مىڭ تەڭگەگە دەيىن ءوستى. وسىلايشا، جالعا الۋشىلار ەندى 40 مىڭ تەڭگەگە ارتىق تولەۋگە ءماجبۇر.
ءۇش بولمەلى پاتەرلەر سول كەزەڭدە 410 مىڭ تەڭگەدەن 450 مىڭ تەڭگەگە دەيىن – ياعني تاعى 40 مىڭ تەڭگەگە قىمباتتادى. ناتيجەسىندە تامىزدىڭ ءبىرىنشى جارتىسىندا الماتىداعى ەكى جانە ءۇش بولمەلى تۇرعىن ءۇيدى جالداۋ باعاسى شامامەن 10-13%-عا ءوستى.
ال ءبىر بولمەلى پاتەرلەر ازىرگە 220 مىڭ تەڭگە شاماسىندا تۇر. ولاردىڭ باعاسى شىلدەنىڭ اياعىندا وسكەن ەدى.
استانادا ءبىر بولمەلى تۇرعىن ءۇي باعاسى ايتارلىقتاي وزگەردى. تامىزدىڭ باسىندا مۇنداي پاتەردى ورتا ەسەپپەن 220 مىڭ تەڭگەگە جالداۋعا بولاتىن بولسا، 18 تامىزعا قاراي باعا 240 مىڭ تەڭگەگە جەتتى. ءوسىم 9،1% قۇرادى.
ەكى بولمەلى پاتەرلەردى جالداۋ 6،7%-عا – 300 مىڭ تەڭگەدەن 320 مىڭ تەڭگەگە دەيىن ءوستى. ءۇش بولمەلى پاتەرلەرگە بۇل ءۇردىس ازىرگە اسەر ەتكەن جوق: ولاردىڭ مەدياندىق باعاسى ايىنا شامامەن 500 مىڭ تەڭگە دەڭگەيىندە قالىپ وتىر.
جالپى قىمباتتاۋعا قاراماستان، كەيبىر قالالاردا جەكەلەگەن تۇرعىن ءۇي ساناتتارى، كەرىسىنشە، ارزاندادى. قوستانايدا ءۇش بولمەلى پاتەردى جالداۋ 6،9%-عا – 290 مىڭ تەڭگەدەن 270 مىڭ تەڭگەگە دەيىن تومەندەدى. تالدىقورعاندا «ءۇش بولمەلى» پاتەرلەر 5،3%-عا ارزاندادى – مەدياندىق باعا 190 مىڭ تەڭگەدەن 180 مىڭ تەڭگەگە دەيىن ءتۇستى.
ماۋسىمدىق سۇرانىستىڭ ارتۋى اياسىندا الاياقتارعا تاپ بولۋ ءقاۋپى دە ارتادى. Krisha.kz سايتىندا اقشانى تۇرعىن ءۇيدى جەكە كورمەي تۇرىپ اۋدارماۋعا، مەنشىك يەسىنىڭ قۇجاتتارىن تەكسەرۋگە جانە مىندەتتى تۇردە جازباشا كەلىسىم جاساۋعا كەڭەس بەرەدى.
ۇيگە كىرگەننەن كەيىن دە پاتەردىڭ جاي-كۇيى مەن ونداعى م ۇلىكتى سۋرەتكە ءتۇسىرۋ ۇسىنىلادى. بۇل كەيىن شىعىپ كەتكەن كەزدە مەنشىك يەسىمەن داۋلاردى بولدىرماۋعا كومەكتەسەدى.