ارقالىق اۋەجايى قۇرىلىس جۇمىستارى مەن سەرتيفيكاتتاۋ راسىمدەرىن اياقتاپ، قىركۇيەك ايىندا تۇراقتى رەيستەردى قابىلداي باستايدى، دەپ حابارلايدى infohub.kz سايتى.
قوستاناي وبلىسىنىڭ اكىمى قۇمار اقساقالوۆتىڭ مالىمەتىنشە، اۋەجاي CRJ200 ءتيپتى وڭىرلىك جولاۋشى ۇشاقتارىن قابىلداۋعا جانە قىزمەت كورسەتۋگە دايىن. جاڭا باعىتتاردا تاسىمالداۋشى رەتىندە SCAT اۋەكومپانياسى شىعادى.
«3 تامىزدا اۋەجاي اۆياسيالىق قاۋىپسىزدىك قىزمەتىنىڭ سەرتيفيكاتىن، 18 تامىزدا «قازاەروناۆيگاسيانىڭ» اەروناۆيگاسيالىق قىزمەت كورسەتۋشى رەتىندە سەرتيفيكاتىن الدى. 21 تامىزدا اەرودرومعا جارامدىلىق سەرتيفيكاتى بەرىلدى»، — دەپ جازدى اكىم.
العاشقى رەيستى 22 تامىزدا قابىلداۋ جوسپارلانعان، ال 1 قىركۇيەكتەن باستاپ تۇراقتى رەيستەر ورىندالا باستايدى. ۇشاقتار سەيسەنبى جانە سەنبى كۇندەرى الماتى — ارقالىق — قوستاناي — ارقالىق — استانا — ارقالىق — الماتى باعىتى بويىنشا ۇشادى.
ارقالىق اۋەجايىنىڭ سەيسەنبىدەگى كەستەسى: الماتى — ارقالىق: 08:50–10:50؛ ارقالىق — قوستاناي: 11:50–12:40؛ قوستاناي — ارقالىق: 13:40–14:30؛ ارقالىق — استانا: 15:30–16:20؛ استانا — ارقالىق: 17:50–18:40؛ ارقالىق — الماتى: 19:40–21:35.
سەنبىدەگى كەستە: الماتى — ارقالىق: 08:40–10:40؛ ارقالىق — قوستاناي: 11:40–12:30؛ قوستاناي — ارقالىق: 13:30–14:20؛ ارقالىق — استانا: 15:15–16:05؛ استانا — ارقالىق: 17:35–18:25؛ ارقالىق — الماتى: 19:25–21:15.
ارقالىق اۋەجايى 1990-جىلدارى جابىلىپ، عيمارات ۇزاق ۋاقىت بويى قاراۋسىز قالعان ەدى. ءقازىر اۋەجاي قالپىنا كەلتىرىلدى جانە رەسمي اشىلۋىنا دەيىن الەۋمەتتىك جەلىلەردە ديزاينى ءۇشىن كوپتەگەن وڭ پىكىرلەر الدى. جاڭارتىلعان اۋەجايدىڭ قانشالىقتى ءتيىمدى جۇمىس ىستەيتىنىن ۋاقىت كورسەتەدى.
بۇعان دەيىن اۋەجاي AYK حالىقارالىق كودىن قايتا العانى حابارلانعان بولاتىن.