ارمەنيانىڭ بۇرىنعى پرەزيدەنتى روبەرت كوچاريان مەملەكەتتىك مەنشىكتى يەمدەنۋ جانە ميللياردتاعان درام كولەمىندە پارا الۋ سحەمالارىنا قاتىستى ايىپ تاعىلعاننان كەيىن اۋرۋحاناعا جەتكىزىلدى، دەپ حابارلايدى infohub.kz سايتى.
بۇعان دەيىن كوچاريان رەسپۋبليكانىڭ سىبايلاس جەمقورلىققا قارسى كوميتەتىنە كەلىپ، ونىڭ ۇستالعانى ساياساتكەردىڭ وكىلدەرى تاراپىنان راستالعان ەدى. ەندى ءىستىڭ رەسمي مالىمەتتەرى بەلگىلى بولدى.
News.am مالىمەتىنشە، سىبايلاس جەمقورلىققا قارسى كوميتەت كوچارياننىڭ ۇستالعانىن راستاپ، ايىپتاۋ ءمانىن اشتى. ۆەدومستۆونىڭ مالىمدەۋىنشە، بۇرىنعى پرەزيدەنت جاقىن ادامدارىمەن الدىن الا ءسوز بايلاسىپ، قىزمەت بابىن پايدالانا وتىرىپ، جالعان نەگىزدەر بويىنشا مەملەكەت مەنشىگىندەگى ءبىرقاتار قۇندى جىلجىمايتىن م ۇلىكتى نارىقتىق باعادان ايتارلىقتاي تومەن باعامەن ساتىپ الىپ، يەمدەنگەن.
م ۇلىكتىڭ ناقتى يەسىن جاسىرۋ ءۇشىن ول ءوزارا بايلانىستى كومپانيالارعا رەسىمدەلگەن، كەيىن بۇل اكتيۆتەر قۇرىلىس، ساتۋ جانە ۇلەستەردى بەرۋ، ونىڭ ىشىندە سىيعا تارتۋ جولىمەن پايدالانىلعان.
تاعى ءبىر ەپيزود بويىنشا، قورعانىس مينيسترلىگىنە تيەسىلى جانە عىلىمي-وندىرىستىك ستانسيا سالۋعا ارنالعان جەر تەلىمدەرى بۇرىنعى پرەزيدەنتكە جاقىن كومپانياعا نارىقتىق باعادان ءتورت ەسە تومەن باعامەن ساتىلعان.
سونىمەن قاتار، تەرگەۋ ورگاندارىنىڭ مالىمدەۋىنشە، جەر تەلىمدەرىن تومەن باعامەن ساتۋ جانە ارمەنيادا جاپوندىق «تويوتا» كومپانياسىنىڭ وكىلدىگىن كەدەرگىسىز قۇرۋدى قامتاماسىز ەتكەنى ءۇشىن 2006 جىلعى 9 مامىردا كوچاريانعا پارا رەتىندە «تويوتا ەرەۆان» كومپانياسىنىڭ 30 پايىزدىق ۇلەسى بەرىلگەن. بۇل ۇلەس بۇرىنعى پرەزيدەنتتىڭ ۇلىنىڭ اتىنا جالعان ساتىپ الۋ-ساتۋ شارتتارىمەن رەسىمدەلگەن.
قىلمىستىق ءىس اياسىندا كوچارياننىڭ ءوزى، ونىڭ ۇلى جانە قىلمىستىق سحەمالارعا قاتىسى بار باسقا دا ادامدار قوسا العاندا، التى ادام ۇستالدى.
تەرگەۋ سونىمەن قاتار ەكس-پرەزيدەنتتىڭ ۇلىنىڭ اتىنا 2001–2019 جىلدارى اۋدارىلعان اقشا اۋدارىمدارىن زەرتتەپ جاتىر: شامامەن 144 ملرد درام، 309 ملن اقش دوللارى، 77 ملن ەۋرو جانە 18 ملن رەسەي ءرۋبلى، سونداي-اق ارمەنيادا جانە شەتەلدە وتىزدان استام جىلجىمايتىن م ۇلىك نىسانىن ساتىپ الۋ. م ۇلىكتى يەمدەنۋدى بولدىرماۋ ءۇشىن وعان تىيىم سالىندى.
سالىق ورگاندارى «Toyota» كومپانياسىنىڭ ەرەۆانداعى كەڭسەسىن مورلەپ تاستادى. سىبايلاس جەمقورلىققا قارسى كوميتەت قىزمەتكەرلەرى سونداي-اق كوچارياندار وتباسى ۇلەسى بار «ورانج فيتنەس» كلۋبى مەن «پلەي سيتي» ويىن-ساۋىق ورتالىعىندا تەرگەۋ ارەكەتتەرىن جۇرگىزۋدە.
ربك دەرەكتەرىنە سايكەس، ارمياندىق 24news.am باسىلىمى ۇستالعاننان كەيىن كوچارياندى ۇلتتىق قاۋىپسىزدىك قىزمەتى قىزمەتكەرلەرىنىڭ ەرتىپ جۇرۋىمەن جەدەل جاردەم كولىگىمەن اۋرۋحاناعا جەتكىزگەنىن حابارلادى. ونىڭ جاعدايى تۋرالى باسقا اقپارات ازىرگە جوق.