الەۋمەتتىك جەلىلەردە inDrive كومپانياسىنىڭ باس ديرەكتورى، ميلليونەر ارسەن تومسكي مەن كاميللا لۋكپانوۆانىڭ ۇيلەنۋ تويى بەلسەندى تالقىلانۋدا. سالتاناتتى ءراسىم ستامبۋلداعى Four Seasons قوناق ۇيىندە ءوتتى، دەپ حابارلايدى infohub.kz سايتى.
سالتاناتتىڭ جۇرگىزۋشىسى يۆان ۋرگانت بولدى، ال شاقىرىلعان ارتىستەر اراسىندا ۆالەري مەلادزە دە بار. اتاقتى قوناقتار قاتارىندا وليمپيادا چەمپيونى ميحايل شايدوروۆ قىزى ايسلۋ مۇرزاعاليەۆامەن، اكتەر ءارى پروديۋسەر نۇرلان قويانبايەۆ، ينۆەستور مارعۇلان سەيسەمبايەۆ، «Technodom Operator» اق نەگىزىن قالاۋشى ەدۋارد كيم، Astana Group كومپانيالار توبىنىڭ پرەزيدەنتى نۇرلان سماعۇلوۆ جانە باسقا دا بيزنەسمەندەر بولدى.
الەۋمەتتىك جەلى قولدانۋشىلارى تويدىڭ التىنسىز، اشىق ءسان-سالتاناتسىز ۇستامدى ءستيلىن اتاپ وتۋدە. قولدانۋشىلاردىڭ ءبىرى: «اقشا مەن جاقسى تالعام قاتار كەلگەندە سيرەك بولادى. وتە ادەمى، كوركەم، اشىق بەزەندىرۋسىز»، — دەپ جازدى.
كەلىننىڭ بەينەسى دە قاراپايىم، ءبىراق وتە ءستيلدى بولدى. كاميللا لۋكپانوۆا نيۋد ماكياج، اشەكەيسىز جانە كەستەسىز، يىعى اشىق، شلەيفى بار اق كويلەك تاڭدادى. بۇل Eva Lendel پرەميۋم ۇيلەنۋ برەندىنىڭ Jess ۇلگىسى بولۋى مۇمكىن، ونىڭ قۇنى كەمىندە $2،5 مىڭ. كەلىننىڭ شاشى قاراپايىم ەتىپ تۇيىنگە جينالعان.
تويعا دايىندىق ماۋسىم ايىندا بەلگىلى بولدى، سول كەزدە تومسكي قازاقتىڭ قۇدا ءتۇسۋ جانە سىرعا سالۋ داستۇرلەرى ورالدا — كەلىننىڭ تۋعان قالاسىندا وتكەنىن ايتقان ەدى. كاميلا لۋكپانوۆا بۇرىن Almaty Tourism Bureau باسقارعان، ۋربانيستيكا ماسەلەلەرىمەن اينالىساتىن Tana قورىن قۇرعان جانە الماتىدا ءبىلىم العان. الەۋمەتتىك جەلىلەرگە قاراعاندا، سوڭعى كەزدەرى ول لوندوندا تۇرىپ، وقىپ ءجۇر.
ارسەن تومسكي 2022 جىلى inDrive كەڭسەسىن رەسەيدەن قازاقستانعا كوشىرىپ، قازاقستان ازاماتتىعىن الدى. 2024 جىلدىڭ مامىرىندا ول $920 ملن بايلىعىمەن قازاقستاننىڭ ەڭ باي بيزنەسمەندەرى رەيتينگىندە 10-ورىنعا يە بولدى. تومسكي ءۇشىن بۇل ءبىرىنشى نەكە ەمەس — ونىڭ ەكى قىزى بار. كاميلا لۋكپانوۆانىڭ دا ءبىر قىزى بار.
توي قارساڭىندا تومسكي Kursiv Talks پودكاستىنە قاتىسىپ، بيزنەس تۋرالى ايتىپ، بولاشاققا بولجامدارىمەن ءبولىسىپ، بالالىق شاعى مەن قالىپتاسۋ جولى تۋرالى وي تولعادى.