مامىر ايىنىڭ سوڭىندا استانا – پاۆلودار تاس جولىندا بولعان جول-كولىك وقيعاسىنان 20 جاستاعى تالعات ەمەل زارداپ شەكتى. ول استانادان اتا-اناسىنا تاكسيمەن بارا جاتقاندا، كولىك جول بوگەتىنە سوعىلعان. اپات سالدارىنان ءۇش ادام جاراقات الدى. ەڭ اۋىر جاراقاتتى تالعات الدى – ول كلينيكالىق ءولىمدى باستان كەشىرىپ، ەكى اياعىنان ايىرىلدى. رولدە ارىس قالاسى اكىمىنىڭ 22 جاستاعى ۇلى بولعان. زارداپ شەگۋشىنىڭ تۋىستارى اكەسىنىڭ بايلانىستارى جۇرگىزۋشىنى جازادان قۇتقارۋى مۇمكىن دەپ قاۋىپتەنەدى، دەپ حابارلايدى infohub.kz.
زارداپ شەگۋشىنىڭ اپكەسى گۇلسىم ابايىلدينوۆا: «كىنالىنىڭ تۋىستارى تەرگەۋ بارىسىنا اسەر ەتە الادى دەپ قاۋىپتەنەمىن. ويتكەنى كىنالىنىڭ اكەسى – ارىس قالاسىنىڭ اكىمى. مەن ادىلدىك قالايمىن، زاڭنىڭ قاتاڭداتىلۋىن قالايمىن. ونىڭ ءبىر جىل ىشىندە 29 رەت جول قوزعالىسى ەرەجەسىن بۇزعانى انىقتالدى»، – دەدى.
جۇرگىزۋشىنىڭ اكەسى، ارىس اكىمى قايسار ماڭقارايەۆ ۇلىنىڭ كامەلەتكە تولعانىن جانە ءوز جاۋاپكەرشىلىگىن ءوزى كوتەرۋى ءتيىس ەكەنىن ايتتى. ول: «مەن ەشقاشان لاۋازىمدىق وكىلەتتىگىمدى جەكە مۇددەمە پايدالانعان ەمەسپىن جانە پايدالانۋدى ويلامايمىن. تەرگەۋ بارىسىنا نەمەسە ءىس بويىنشا قابىلداناتىن پروسەسسۋالدىق شەشىمدەرگە اسەر ەتۋگە ەشقانداي ارەكەت جاساماعانىمدى جانە جاسامايتىنىمدى ايتامىن. زاڭ بارىنە بىردەي. بۇل قاعيدا مەنىڭ وتباسىمنىڭ مۇشەلەرىنە دە بىردەي قولدانىلادى»، – دەپ اتاپ ءوتتى.
تاكسي جۇرگىزۋشىسى ءۇي قاماۋىنا الىنعان. وعان قاتىستى «جول قوزعالىسى نەمەسە كولىك قۇرالدارىن پايدالانۋ ەرەجەلەرىن بۇزۋ، ابايسىزدا ادام دەنساۋلىعىنا اۋىر زيان كەلتىرۋ» بابى بويىنشا سوتقا دەيىنگى تەرگەۋ جۇرگىزىلۋدە. بۇل باپ ەكى جىلعا دەيىن باس بوستاندىعىنان ايىرۋدى كوزدەيدى.
بۇعان دەيىن ماڭعىستاۋدا ءتورت ادام قازا تاپقان تاعى ءبىر جول-كولىك وقيعاسىنىڭ كىنالىسىنە ۇكىم شىعارىلدى.