شىعىس قازاقستان وبلىسىندا ىزدەۋدە جۇرگەن سوتتالعان ادام ۇستالدى. ونى ۇيىنە اشتىق الىپ كەلگەن، دەپ حابارلايدى infohub.kz سايتى.
وبلىستىڭ قىلمىستىق-اتقارۋ جۇيەسى دەپارتامەنتىنىڭ ءباسپاسوز قىزمەتىنىڭ مالىمەتىنشە، پروباسيا قىزمەتىنىڭ ەسەبىندە تۇرعان ەر ادام جازاسىن وتەۋ ءتارتىبىن جۇيەلى تۇردە بۇزعان: ەسەپكە كەلمەگەن، تۇرعىلىقتى جەرى بويىنشا بولماعان جانە باقىلاۋدان جالتارعان.
بىرنەشە رەت بۇزعانى ءۇشىن پروباسيا قىزمەتى سوتقا پروباسيالىق باقىلاۋدى باس بوستاندىعىنان ايىرۋمەن الماستىرۋ تۋرالى ۇسىنىس جىبەرگەن. الايدا سوت وتىرىسى كەزىندە ەر ادام ءوزىن ناشار سەزىنەتىنىن ايتىپ، ءىستى قاراۋدى كەيىنگە قالدىرۋدى سۇراعان. كەيىنگە قالدىرۋ العان سوڭ، ول جاسىرىنىپ كەتكەن.
العاشقى ىزدەۋ شارالارى ناتيجە بەرمەگەن سوڭ، سوتتالعان رەسمي تۇردە ىزدەۋ جاريالانعان، ال جازا مەرزىمى توقتاتىلعان. «ءتىپتى اكەسى قايتىس بولعاندا دا ول جەرلەۋگە كەلمەگەن، جاسىرىنا بەرگەن. ىزدەۋدەگى بەتبۇرىس پروباسيا قىزمەتىنىڭ جۇمىسىندا قولدانىلاتىن سيفرلىق قۇرالدار بولدى. ىزدەۋدەگى ادامنىڭ ۇيالى قۇرىلعىسىنان جاسالعان تەلەفون قوڭىراۋىنان كەيىن ونىڭ بەلسەندىلىگى تىركەلىپ، بۇل ونىڭ ورنالاسقان جەرىن تەز انىقتاۋعا مۇمكىندىك بەردى»، – دەدى شقو بويىنشا قاجد.
پروباسيا قىزمەتىنىڭ قىزمەتكەرلەرى پوليسەيلەرمەن بىرگە دەرەۋ كورسەتىلگەن مەكەنجايعا جەتكەن. قاشۋ مۇمكىندىگىن بولدىرماۋ ءۇشىن ولار ۇيگە ءبىر مەزگىلدە نەگىزگى جانە قوسالقى كىرەبەرىستەردەن كىرگەن. سول كەزدە ىزدەۋدەگى ادام ۇيدە داستارقان باسىندا وتىرىپ، اناسى دايىنداعان تاماقتى جەپ وتىرعان. سوتتالعان سول جەردە ۇستالىپ، ۋاقىتشا ۇستاۋ يزولياتورىنا قامالعان.
جاقىن ارادا سوت بۇرىن تاعايىندالعان پروباسيالىق باقىلاۋ جازاسىن باس بوستاندىعىنان ايىرۋمەن الماستىرۋ جانە ونى قىلمىستىق-اتقارۋ جۇيەسى مەكەمەسىنە جىبەرۋ ماسەلەسىن قارايدى.