جەتىسۋ وبلىسىنداعى «كوكتال» وقۋ پوليگونىندا ورتالىق ازيا ءوڭىرىنىڭ ۇجىمدىق جەدەل ورنالاستىرۋ كۇشتەرىنىڭ «رۋبەج-2026» بىرلەسكەن وقۋ-جاتتىعۋى باستالدى. وعان قازاقستان، قىرعىزستان، رەسەي جانە تاجىكستان اسكەري قىزمەتشىلەرى قاتىسىپ جاتىر، دەپ حابارلايدى infohub.kz سايتى.
NUR.KZ قورعانىس مينيسترلىگىنە سىلتەمە جاساپ حابارلاعانداي، ۇجىمدىق قاۋىپسىزدىك تۋرالى شارت ۇيىمىنا مۇشە ەلدەردىڭ اسكەريلەرى جەتىسۋ وبلىسىنداعى «كوكتال» پوليگونىندا بىرلەسكەن دايىندىققا كىرىستى.
وقۋ-جاتتىعۋ بارىسىندا ءتورت ەلدىڭ اسكەري قىزمەتشىلەرى بىرلەسكەن دايىندىق، باسقارۋ ورگاندارى مەن ۇلتتىق كونتينگەنتتەردىڭ ءوزارا ءىس-قيمىلى ماسەلەلەرىن پىسىقتاۋدا.
«وقۋ-جاتتىعۋ 13-18 قىركۇيەك ارالىعىندا قازاقستان رەسپۋبليكاسى قارۋلى كۇشتەرىنىڭ دەسانتتىق-شابۋىلداۋ اسكەرلەرىنىڭ قولباسشىسى پولكوۆنيك ماحسۋت گۋسەينوۆتىڭ باسشىلىعىمەن ءوتىپ جاتىر. وعان 1500-گە جۋىق اسكەري قىزمەتشى جانە 115 ۇشقىشسىز ۇشۋ اپپاراتىن قوسا العاندا، 300-دەن استام قارۋ-جاراق، اسكەري جانە ارنايى تەحنيكا جۇمىلدىرىلدى»، — دەلىنگەن قورعانىس ۆەدومستۆوسىنىڭ حابارلاماسىندا.
اتالعان ۆەدومستۆو پراكتيكالىق ءىس-قيمىلدار ءتاۋ-شولدى جەر بەدەرىنىڭ ەرەكشەلىكتەرى ەسكەرىلە وتىرىپ ءوتىپ جاتقانىن جانە قازاقستاننىڭ شەكارا قىزمەتى مەن ۇلتتىق ۇلانى بولىمشەلەرىمەن ءوزارا ءىس-قيمىلدى كوزدەيتىنىن اتاپ ءوتتى.
بۇعان دەيىن قازاقستان رەسپۋبليكاسىنىڭ قورعانىس مينيسترلىگى قازاقستاندىقتاردى الداعى ۇقشۇ وقۋ-جاتتىعۋى تۋرالى ەسكەرتكەن بولاتىن. وسىعان بايلانىستى ءۇش وڭىردەگى جولداردا اسكەري تەحنيكا جۇرەدى.