استانا اكىمدىگى قوعامدىق كولىكتە قولما-قول اقشاسىز تولەم جاساعاندا جول ءجۇرۋ قۇنىن 150 تەڭگەگە كوتەرۋدى ۇسىنىپ وتىر. جاڭا تاريف 2026 جىلعى 1 جەلتوقساننان باستاپ كۇشىنە ەنۋى مۇمكىن، دەپ حابارلايدى infohub.kz سايتى.
جاڭا تاريف قازىرگى باعادان 40 تەڭگەگە، ياعني شامامەن 36%-عا قىمبات.
اكىمدىكتە باعانىڭ ءوسۋىن تاسىمالداۋشىلاردىڭ شىعىنى ارتۋىمەن تۇسىندىرەدى. ۆەدومستۆو دەرەگىنشە، 2014 جىلدان بەرى ديزەل وتىنىنىڭ باعاسى ليترىنە 107 تەڭگەدەن 329 تەڭگەگە دەيىن كوتەرىلگەن. ول كەزدە اۆتوبۋس جۇرگىزۋشىلەرى ورتا ەسەپپەن 100–150 مىڭ تەڭگە الاتىن بولسا، ءقازىر ولاردىڭ جالاقىسى 700 مىڭ تەڭگەدەن باستالادى، ال مولشەرى اۆتوبۋس سىنىبى مەن جۇمىس رەجيمىنە بايلانىستى. قوسالقى بولشەكتەر، جوندەۋ جۇمىستارى جانە اۆتوبۋستاردىڭ ءوزى دە قىمباتتادى. سوڭعى ءۇش جىلدا تاسىمالداۋشىلار ەلوردا ءۇشىن 1127 جاڭا اۆتوبۋس ساتىپ العان.
«پايدالانۋ شىعىندارىنىڭ وسۋىنە، قوعامدىق كولىكتىڭ تۇراقتى جۇمىسىن قامتاماسىز ەتۋ قاجەتتىلىگىنە، اۆتوبۋس پاركىن ودان ءارى جاڭارتۋعا جانە باعىت جەلىسىن دامىتۋعا بايلانىستى 1 جەلتوقساننان باستاپ قولما-قول اقشاسىز تولەم كەزىندە جول ءجۇرۋ قۇنىن 150 تەڭگە مولشەرىندە بەلگىلەۋ ۇسىنىلىپ وتىر»، — دەپ مالىمدەدى اكىمدىكتە.
اكىمدىكتىڭ حابارلاۋىنشا، قازىرگى جەڭىلدىك ساناتتارى ءۇشىن تەگىن ءجۇرۋ ساقتالادى. ولاردىڭ قاتارىندا زەينەتكەرلەر، مۇگەدەكتىگى بار ادامدار، كوپبالالى وتباسىلار جانە استانادا وقيتىن 18 جاسقا دەيىنگى بالالار بار.
ءتاريفتى كوتەرۋ تۋرالى شەشىم ازىرگە قابىلدانعان جوق. ەگەر ول بەكىتىلسە، 1 جەلتوقساننان باستاپ قولما-قول اقشاسىز تولەم كەزىندە جول ءجۇرۋ 150 تەڭگە تۇرادى.
بۇعان دەيىن «كۋرسيۆ» استاناداعى جرت جولاۋشىلارى ءۇشىن جاڭا تاريفتەر ەنگىزىلگەنىن جازعان بولاتىن.