قازاقستان استاناسىندا قالالىق ەلەكتر جەلىسىنە قوسىلماي جۇمىس ىستەيتىن ەلەكتروموبيلدەرگە ارنالعان اۆتونومدى كۇن زاريادتاۋ ستانسياسى جۇمىسىن باستادى. بۇل پيلوتتىق جوبا ەل بويىنشا وسىنداي نىساندار جەلىسىن قۇرۋعا نەگىز بولا الادى، دەپ حابارلايدى infohub.kz سايتى.
ەكولوگيالىق حاب «الاتاۋ» سپورت كەشەنىنىڭ اۋماعىندا ورنالاستىرىلدى. ونى ازىرلەۋشى — BOLASHAQ POWER قازاقستاندىق كاسىپورنى.
ستانسيا off-grid فورماتىندا جۇمىس ىستەيدى، قۋاتى 100 كۆت كۇن گەنەراسياسىن جالپى سىيىمدىلىعى 645 كۆت·ساع ەنەرگيا جيناقتاعىشتارمەن بىرىكتىرەدى. نىسان قازاقستاننىڭ جاسىل تاكسونومياسىنىڭ تالاپتارىنا دا سايكەس كەلەدى.
قازىرگى ۋاقىتتا جوبا قاتىسۋشىلارى رەسپۋبليكالىق تراسسالار بويىنا، قالالارعا، ونەركاسىپتىك كاسىپورىندارعا جانە باسقا دا ينفراقۇرىلىم نىساندارىنا وسىنداي ستانسيالار ورناتۋ مۇمكىندىگىن قاراستىرۋدا.
ق ر ەكولوگيا جانە تابيعي رەسۋرستار ۆيسە-مينيسترى مانسۇر وشۋرباەۆتىڭ ايتۋىنشا، مىندەت — جەكەلەگەن دەمونستراسيالىق جوبالاردان تولىققاندى ينفراقۇرىلىمعا كوشۋ. «ءبىز جەكە جاسىل نىسانداردى ەمەس، تومەن كومىرتەكتى ەكونوميكانىڭ تۇتاس ينفراقۇرىلىمىن قۇرۋىمىز كەرەك، وندا جاڭارتىلاتىن ەنەرگەتيكا، ەلەكتر كولىگى، يننوۆاسيالىق تەحنولوگيالار جانە كومىرتەكتى جوبالار ءبىرتۇتاس جۇيە رەتىندە جۇمىس ىستەيدى»، — دەپ اتاپ ءوتتى ول.
ۆەدومستۆودا مۇنداي جەلىنى دامىتۋ ءبىر مەزگىلدە ەلەكتروموبيلدەرگە ارنالعان ينفراقۇرىلىمدى كەڭەيتۋگە جانە ولاردى پايدالانۋدىڭ كومىرتەگى ءىزىن ازايتۋعا مۇمكىندىك بەرەدى دەپ سانايدى. سونىمەن قاتار، مۇنداي جوبالاردى پاريج كەلىسىمىنىڭ 6-بابى اياسىندا قازاقستاننىڭ جەكە ينۆەستيسيالاردى تارتۋى جانە كليماتتىق جوبالارىن دامىتۋ ءۇشىن پايدالانۋ جوسپارلانۋدا.