استانا تۇرعىنى Threads الەۋمەتتىك جەلىسىندە ەلورداداعى تۇنگى كلۋبتاردىڭ بىرىندە بولعان جانجال تۋرالى جازدى. ونىڭ ايتۋىنشا، بەلگىسىز ەر ادام ونىڭ قۇربىسىنىڭ بەتىنە ستاكانمەن سوققى بەرىپ، كەيىن ىشىنە تەپكەن، دەپ حابارلايدى infohub.kz.
اۆتوردىڭ ايتۋىنشا، مەكەمە كۇزەتشىلەرى وقيعاعا ارالاسپاعان، ال وقيعا ورنىنا كەلگەن پوليسەيلەر كومەك كورسەتۋدىڭ ورنىنا شابۋىلعا ۇشىراعان قىزدىڭ ءوزىن ايىپتاعان. ونىڭ سوزىنشە، ەر ادامدى الدىمەن شەتكە الىپ كەتكەن، ءبىراق كەيىن ول باردان كەتە العان. وسى ۋاقىتتا ءتورت كۇزەتشى قىزداردى كىرەبەرىستە ۇستاپ تۇرعان. پوليسيانى زارداپ شەككەندەردىڭ وزدەرى شاقىرعان.
قىزدىڭ ايتۋىنشا، قۇقىق قورعاۋ ورگاندارى تاراپىنان كومەك كۇتكەن ولار تۇنگى مەكەمەدە نەگە جۇرگەندەرى تۋرالى سۇراقتارعا تاپ بولعان. پوليسەيدىڭ نەلىكتەن قىزداردىڭ جاعىندا تۇرماعانىن سۇراعاندا، ول وعان اناسىن، ايەلىن نەمەسە اپكەسىن ەسكە سالعان. «كەرەك بولسا، مەنىڭ ايەلىم دە ***** الادى»، — دەپ جاۋاپ بەرگەن پوليسەي. قىزدىڭ قۇربىسى شوك كۇيىندە بولعاندىقتان، ارىز جازۋدان باس تارتىپ، تەزىرەك كەتكىسى كەلگەن.
Threads-تەگى وقيعاعا ەلوردالىق ەسىل اۋدانىنىڭ پوليسياسى پىكىر ءبىلدىردى. «بۇل فاكت ەسىل اۋدانىنىڭ پوليسيا باسقارماسىندا تىركەلدى، تەكسەرۋ جۇرگىزىلۋدە. تەكسەرۋ ناتيجەلەرى بويىنشا قازاقستان رەسپۋبليكاسىنىڭ قولدانىستاعى زاڭناماسىنا سايكەس ءتيىستى قۇقىقتىق باعا بەرىلىپ، قاجەتتى شارالار قابىلدانادى»، — دەپ حابارلادى پوليسيا. سونىمەن قاتار، جاريالانىمدا كورسەتىلگەن ءمان-جايلار ازىرگە رەسمي راستالعان جوق. تەكسەرۋ وقيعانىڭ ءمان-جايىن انىقتاپ، پوليسيا قىزمەتكەرلەرى مەن مەكەمە كۇزەتىنىڭ ارەكەتتەرىنە باعا بەرۋى ءتيىس.
بۇعان دەيىن «كۋرسيۆ» اقتاۋداعى كافەلەردىڭ بىرىندە بولعان جانجال بويىنشا سوت پروسەسى باستالعانىن جازعان بولاتىن. سول كەزدە جەلىدە بىرنەشە ەر ادامنىڭ قىزعا شابۋىل جاساپ، بىرەۋى ونى شاشىنان تارتىپ، ەدەنگە سۇيرەگەن ۆيدەو تاراعان ەدى.